KHAWTHLIR

Hrangbana College NSS unit chuan nimin khan an college Golden Hall-ah blood donation camp an huaihawt a, Aizawl Civil Hospital tan thisen unit 188 an pe a, a petute mipa 116 leh hmeichhia 72 an ni. Administrative Training Institute-in Mamitah sorkar department hrang hranga group B leh C employee-te tana induction training a buatsaiha telte pawhin Thawhṭanni khan Mamit District Hospital-ah thisen unit 10 an pe bawk. 

Power & Electricity department chuan vawiin Nilaini hian Melriat Sub-Station-ah hna an thawh dawn avangin vawiin chawhma dar 10:30 leh chawhnu dar 2:30 inkarah power supply tihtawp a ni dawn thu an puang. Hei vang hian, Mission Veng, Mission Vengthlang, Tlangnuam leh chhimphei tlangdung khuate'n kawlphetha an nei thei dawn lo a ni.

Cooperation department leh National Cooperative Development Corporation (NCDC), North Eastern Region Regional Directorate-te chuan nimin khan Assembly Annexe-ah ‘NCDC Regional Award for Cooperative Excellence & Merit 2019’ semna programme an buatsaih. Award chu Cooperation minister C Lalrinsanga'n Champhai Town Multipurpose Cooperative Society Ltd.-te hnenah a hlan a ni.

UPC, Mizorama rawngbawltute pualin February 4, Thawhṭanni zan aṭang khan Govt. Complex Kohhran biak-inah seminar neih a ni a, vawiinah zawh a ni ang. Seminar-ah hian Mizoram UPC pastor 71 an tel a, Mission field leh ram páwna bial vawngtu pastor-te erawh an tel lo. Rawngbawlna atana  pawimawh thil chi hrang hrang an zirho a ni.

Chakma Autonomous District Council (CADC) Deputy Chairman atan nimin khan MNF member Mohesh Boran Chakma chu chuhtu awm loin thlan tlin a ni. Mohesh hi MNF ticket-in Ajasora bialah MDC atan thlan tlin a ni a, CADC deputy chairman Durjya Dhan Chakma chu a thlak a ni. Durjya Dhan Chakma chu CADC sorkar, MNF kaihhruaiah executive member a ni thung.