Ruihhlo hmansual leh ruihhlo do hi Mitin mawhphurhna a ni - Dr K Beichhua

International Day Against Drug Abuse & Illicit Trafficking pualin nimin khan Dawrpui Multipurpos Centre-ah hun hman a ni a, khuallian Social Welfare minister Dr K Beichhua chuan ruihhlo hmansual leh ruihhlo do chu mitin mawhphurhna a nih thu a sawi.

Social Welfare Minister chuan ruihhlo hmansual leh dan kalhna ruihhlo tawlhruk do chu state chhunga mipuite zawng zawng zawng mawhphurhna a nih thu sawiin, "Sorkar, tlawmngai pawlte, de-addiction centre enkawltute emaw mi ṭhahnem ngai falte kutah mawhphurhna kan dah ringawt chuan thui a kal theih loh. Ruihlo hmansual hi ven theih a ni a, hmangsual mekte pawh enkawl theih an ni. Hemi kawnga hmalaknaah hian mi zawng zawng kan ṭanrual a ngai a ni," a ti.

Kum 40 chuang ruihhlo avangin Mizoramin harsatna a tawh thu sawiin Dr K Beichhua chuan, "Tun thlenga hma kan sawn theih lohna chhanahte tumah inmawhpuh bik loin kan inenchian ṭheuha kan ngaihven tlan pawh a ṭul hle tawh a ni. Mizoram hi ruihhlo tawlhna kawng a ni a, ruihhlote hian min kal pel mai loa, min chamchilha, nunna tam tak kan chan phaha, mi tam tak chhawr tlak lohin a siam a ni," a ti a, chhungkaw tam tak ruihhlo avanga an rum thu a sawi.

Social Welfare Minister chuan ruihhlo avanga kan ram dinhmun ṭha lo sorkarin a hriat thu sawiin, "Excise, police leh a dangten theih tawp an chhuah a ni. Central YMA leh tlawmngai pawl ṭhenkhatten nasa takin tha an thawh mek bawk a, kan zia chho viau tawh nain kan tha erawh thlah chi a ni lo. Nasa zawka ṭan kan lak a ngai a ni. Kawngtin leh kil tinah sorkarin theihtawp chhuah a tum a, pawn lamah leh jail chhungahte thleng pawh awmze nei zawka hmalak chhoh tum a ni," a ti.

Dr K Beichhua hian ruihhlo laka fihlim tura infuihna leh ruihhlo ngaite ṭanpuina lama inzirtirna video clip tawi, ruihhlo ngaite enkawlna tur lehkhabu hrang hrang leh ruihhlo ngaite enkawlna hmun (de-addiction centre) te zawm ngei ngei tur leh inkaihhruaina lehkhabu (Standard Operation Procedures)-te chu a tlangzarh nghal a ni.

Inkhawmah hian CYMA vice president R Lalngheta kaihhruaina hnuaiah ruihhlo ngaite ṭanpuina kawnga ṭanpui tura intiamna sawirual a ni a, chumin hnuah ruihhlo avanga nunna chante sunna leh hriatrengna pualin sathau khawnvar a huhoa chhit a ni.

International Day Against Drug Abuse & Illicit Trafficking hi kumtin June 26-ah kum 1986 aṭang khan hman ṭhin a ni a, Mizoramah chuan hun remchang zawk dapin nimin khan hman a ni. Kummin hian thupui atan "Health for Justice, Justice for Health" hman a ni.