KHAWTHLIR

Serchhip District Level Committee on Enforcement of Correct Transaction of POL, LPG, Iron Rod, etc., nimina addl. DC Chuauhnuna hoa ṭhukhawm chuan district chhunga bungraw chi hrang hrang buk tling lo leh pawlh dala zuarte veng tur leh dap chhuaktu tur sub committee/squad an din. Sub-squad hian bungrua a bikin LPG, POL, cement, iron rod leh bungraw dangte chu a tul hun apiangah an endik ṭhin dawn a, a duh apiangin thil dik lo awm nia hriat te chu he sub-squad hnenah hian an thlen thei ang.

Agriculture minister C Lalrinsanga chuan nimin zing khan Darlak leh Bawngva khua a tlawh a, agriculture lama hmasawnna hnathawh dan tur a enfiah. Minister hi bialtu MLA H Lalzirliana, MLA Dr ZR Thiamsanga leh Agriculture dept. official-te'n an ṭawiawm.

RTI Act hmanga School Education department-a information dil, department SPIO-in a chhanna Vanglaini-a tarlan chu September 31, 2017-a School Education department record anga an chhanna a ni. Vanglaini palaiin kumin May thla velah School Education department-ah information dilna a thehlut a, department chuan June 10, 2019-ah chhanna a pe chhuak a ni.

Naupanga kawṭhalo thlen theitu rotavirus hrik laka invenna (rotavirus vaccine) Mizorama kalpui tur chungchangah nimin khan Lawngtlai Press Club-ah thuthar thehdarhtute tan media workshop buatsaih a ni. Workshop-ah hian Lawngtlai District Immunisation Officer Dr S Thaizi rotavirus hrik chungchang, a venna vaccine pawimawhna leh hmalakna kalpui tum dan tlangpui a sawifiah.

Rural Development minister Lalruatkima chuan Serchhip district chhunga an department hmunhma hrang hrang a tlawh a, Khawlailungah YMA Run sakna tur lungphum a phum bawk.

159 Bn. BSF-te chuan an huam chhunga hmun hrang hrangah Civic Action Programme kalpuiin, June 28, 2019 atang khan khaw hrang hrangah a thlawna inentirna an buatsaih a, nimin khan Tippereghat-ah tun ṭuma a tawpna atan an buatsaih leh. Khaw hrang hranga free clinic an neihnaah hian mi 570 vel an inentir a, sikserh vei mi pali hmuh chhuah a ni.