Hmun hrang hrangah Remna Ni lawm a ni

Nimin khan Mizoram hmun hrang hrangah Remna Ni lawm a ni a, Saitualah chuan an khaw auditorium-ah bialtu MLA, minister R Lalzirliana, dy. chief whip Lalrintluanga Sailo leh MLA Ramthanmawia hoa hun hman a ni.

R Lalzirliana chuan Remna Ni chu Mizo mipui zawng zawng ta a nih thu a sawiin, " India sorkar leh Mizo National Front-ten remna ziak mah se, Mizoram tana inrem an nih avangin Mizo mipui zawng zawng huap a ni. Tlawmna ni a ni lo a, Mizo mipui zawng zawng, kohhran leh tlawmngai pawlte ṭawngṭaina leh beiseina chhanna anih avang­in kan tan chuan 'Hnehna Ni' a ni," a ti.

India ram leh khawvel hmun hrang hrang thlirin keini inremna tluka remna tluantling nei hi an vang tih sawiin R Lalzirliana chuan, "Hei hi Mizo mipuite rinawmna vang a ni," a ti a, hnam pasalṭhate inhlanna leh tawrhnate kan zahthiam a, kan hriatreng a ṭul thu a sawi.

Saitual Auditorium hun hman anih hma hian Saitual field bula hnam pasalṭha martar mi 22 te hriatrengna lungphun tlawhin Minister leh MLA-te hian pangpar an dah a ni. Mamitah chuan Remna Ni hi Chhimveng YMA Hall-ah hman a ni a, minister C Lalrinsanga, bialtu MLA H Lalzirliana leh MLA Dr ZR Thiamsangate'n an hmanpui.

C Lalrinsanga chuan Remna Ni chu party mal ta ni loin, Mizo zawng zawng ta a nih thu sawiin, "Mizoramin rambuai avanga harsatna tam tak a tawh laia, zalenna hmel kan hmuhna tura luchhum banchhum huama sul lo sutu kan hruaitu hmasate hmalakna a fakawm hle. Mizote hi Pathian hriat leh zawnchhuah ram kan nih angin tuna kan dinhmun mai ni lo, economics independent kan hma maia awm thleng turin mimal leh sorkarin theihtawp chhuaha ṭan kan lak a ṭul," a ti.

Agriculture Minister chuan kan ram leh hnam amaha a din ve theihna tur chuan kan intodelh hmasak a ṭul tih sawiin, "Chumi tur chuan Agriculture department kaltlangin kawng hrang hranga hma lak chhoh tum a ni. Ram pawn aṭanga kan lakluh, kan lo mikhual rei tawh tak takte chu thlakthleng tura ruahmanna siam chhoh mek zel a ni,"  ti a, Mamit district chu ram leilung hausakna hmang ṭangkai tura hmalakna hmun tur a nih thu a sawi.

Remna Ni hi Lungdaiah chuan an khaw YMA hall-ah lawm a ni a, an hun hmanpuitu minister of state K Lalrinliana chuan ṭhangtharten Remna Ni hi lawmna chang an hriat a pawimawh thu sawiin, "Pathianin kohhran leh mipuite ṭawngṭaina a chhang a, A remruatnain sorkarna an siam a, Mizo hnam kalphung tur chu Pathian in ruahman sa a nei a, chuvangin awm mai mai hman kan ni lo.

K Lalrinliana chuan Mizoram hi Pathian­in min pek a nih thu sawiin, "Intodelhna kawngah nasa taka ṭan lak a pawimawh. He ram lo la luah zel tur kan tu leh fate tan ro khawm tlak kan zuah sak/siam sak a ngai  a ni," a ti a, Remna Ni chu Mizoram mipuiten intodelhna kawnga suangtuahna thar neih nan hman ṭheuh a duh thu a sawi.

Sialsir khuaah chuan Remna Ni hi minister of state Lalruatkima hoin an khaw community hall-ah hman a ni. Lalruatkima chuan kan zalenna mei hi a mit tur a ni lo tih sawiin, "Engtik niah emaw chuan Zofate ramtiam, Zohnahthlak zawng zawngte zalenna famkim neia rorelna pakhat hnuaia kan awm hun a la thlen ngei i beisei tlat ang u. Chu zalenna meichher chu Zofa zawng zawng, India ram chhunga State hrang hranga awmte leh Foreign rama awm rihte pawhin i chhinung reng ang u," a ti.