Rualbanlote chanvo hrang hrang tarlang
Mizoram sorkar chuan thuchhuah siamin, rualbanlote dikna leh chanvo tarlanna leh humhalhna dan - The Rights of Persons with Disabilities Act, 2016 (RPwD Act, 2016) hman a nih aṭangin rualbanlo chi hrang 7 ni thin kha 21 ah tihpun a nih thu tarlangin, "Kum 2011 Census in a tarlan danin Mizoramah rualbanlo mi 15,160 an awm a, mipa 8,198 leh hmeichhia 6,962 an ni," a ti a, rualbanlote dikna leh chanvo hrang hrangte an tarlang.
Rualbanlote chanvo ṭhenkhatte :
* Office of the Commissioner for Persons with Disabilities hian rualbanloten hma an sawn theihna turin leh an dikna chanvo an hriat a an neih theihna turin nasa takin hma a la a ni. RPwD Act leh rules pawh mipui tam zawkin a an hman ṭangkai theihna turin Mizo ṭawngin a let chhuak tawh.
* RPwD Act, 2016 in a phut angin rualbanloten an dikna leh chanvo hrang hrangte an neih theihna tura committee siam ngaite pawh Mizoram sorkarin a siam.
* Sorkar department hnuaia rualbanlo hnathawkten harsatna/lungawilohna an thlenna turin Grievance Redressal Officers ruat an ni.
* Rualbanlote zingah sorkar hna hi mi 60 velin an hmu tawh a, sorkar pawhin rualbanlo sorkar hnathawkten an hnathawhnaah harsatna an tawh loh nan ruahmanna an siam tur a ni.
* Promotion chungchangah pawh mi dangte angin dikna an nei a, en hran bik tur an ni lo.
* Mi tupawh sorkar hna a thawh laia tawh sual a tawh avanga rual a banlo a nih pawhin hriatthiam tur an ni.
* Zirna sang (higher education) ah te 5% seat rualbanlote tan hauh tur a ni a, kum lamah pawh kum 5 ngaihhnathiam tur an ni.
* Zirna-inte hian rualbanlo nih vangin tumah an en hrang tur a ni lo a, infiamna leh intihhlimna kawngah pawh an tlin tawk angin a ngaihtuahpui tur a ni.
* Agriculture ram leh in hmun thehna kawngah pawh rualbanlote tan 5 % hauhsak tur a ni a, rualbanlo hmeichhiate duhsak hmasak tur an ni.
* Development programme hrang hrangah leh retheihna umbona (poverty alleviation) kawngah pawh 5% hauhsak tur an ni a, hmeichhiate duhsak hmasak tur an ni.
* Hriatna ṭha lo (hearing impaired) sorkar hnathawkte tan hospital-a awm kher ngai loin an mamawh bengdarte dan angin an thlak in an reimburse theih tawh tur thu Finance department chuan notification ni 03.09.2018 khan a ti chhuak.
* Sorkara department hrang hrangah rualbanloten sorkar hna an hmuh ve theihna turin reservation buatsaih a ni. Hemi kawnga in zirtirna pawh Mizoram sorkar hnathawk tan October 25 & 26,2018 khan a buatsaih tawh. Training-a zirtirna pe turin mithiam, Institute of Secretariat Training and Management (ISTM), New Delhi aṭangin an lo kal a, mi 70 bawr vel ni hnih chhung training pek an ni.
* Mizoram sorkar chuan rualbanlote hamthatna tur kawng hrang hrang a ngaihtuah a. Rualbanlote dikna leh chanvo puanzarna tur leh mamawh dangte phuhruk nan Commissioner Office pawh cheng nuai 30 (30 lakhs) NEDP hnuaihah a pe bawk a ni.
* Central sorkar pawhin rualbanlote hamṭhatna hi ngai pawimawhin MZU-ah Centre for Disability Studies chu ni 5.07.2018 khan a hawng.
* Rualbanlote tana hamṭhatna hrang hrang awmte dawng tur hian rualbanlo chu a rualbanlohna 40% chin chunglam a ni tur a ni.
* Gauhati High Court remtihpuina in Law & Judicial department, Govt, of Mizoram chuan rualbanlote laka hleilenna a awm lohna turin leh hetiang kawng a hma la thei turin district hrang hranga magistrate-te chu a ruat.