Academic session thar aṭangin Sikul hun tihdanglam tum a ni

Federation of Mizoram Government School Teachers (FMGST)-in nimina Dawrpui Multipurpose Hall-ah inkhawm­pui an neih a hmanpui­naah School Education Minister chuan, "Academic session thar, April aṭangin school timing thar kan kalpui dawn a, a timing erawh ka la sawi thei lo. Zirtirtu asso­ciation hrang hrangte ka kawm pawhin sikul kai hun tih­danglam an duh tih a lang," a ti.

Lalchhamdama Ralte chuan, Mizo culture leh khawsak phung milin sikul kai hun tihdanglam a nih dawn thu sawiin, "A ngai anga kal ṭha tite an awm a, chu'ngte rawtna nen enmil chungin sikul kai hun hi siam a ni dawn. Zirlaite dinhmun, kan ram dinhmun thlir a ngai a ni," a ti a; sikul kai hun tihdanglamna order chu February 2019 chhunga chhuah a nih tur thu a sawi.

School Education Minister hi nimin vek khan a pisaah MZP hruaitute an hmu a; sikul kai hun tun hmaa hman ṭhin zing dar 9:30-a sikul ṭan a, tlai dar 4-a bàn chu an duh loh thu an thlen. Minister chuan, MZP rawtna hi uluk taka en zui a nih tur thu a sawi. 

MZP president L Ramdinliana Renthlei chuan, sikul ṭan hun chu zing dar 8:30 emaw dar 9 ni se an duh thu sawiin, "Dar 8:30 emaw dar 9 ni se kan duh a, sikul neitute'n an duh zawk zawk hmang mai se kan duh. Zing dar 9:30-a sikul ṭan a nih leh dawn chuan MZP chuan kan dodal dawn," a ti.

MZP hruaitute chuan, school academic session hman mek April - March chu Mizo society leh Kristianna nen a inmil loa an ngaih thu Minister hnenah an thlen a; January-December school academic session atana hman leh a nih theih nana hma la turin an ngen.

Continuous and Compre­hensive Evaluation (CCE) ṭha an tih loh thu sawiin MZP chuan, "Zirlai naupang rilruah rah ṭha lo a chhuahah kan ngai," an ti a; hemi chungchangah hian Education Minister chuan a ṭul anga ennawn a, siamṭhat a tum thu a sawi a ni.