SHC member-te lak luh an ni

Sinlung Hills Council (SHC) thla ruk dang pawhsei a nih hnua member atana ruat thar mi 14-te chu, nimin khan Aizawl DC mawhphurhna la mektu VL Hruaizela Khiangte-in rinawmna thu tiamtirin a la lut.

SHC interim period hi January 8, 2019 khan thla ruk dang atan pawhsei a ni a, member ruat tharte chu - chief executive member atan Lalthlamuana Hmar, chairman Lalmalsawma Darngawn, deputy CEM Lalbiaknunga te bakah, executive mem­ber - Lal­rosiem, Ngur­hrang­kima, R Lalfakzuala, Melo­dy Lalchhuangzeli an ni. Member dang - D Hmangaiha, H Laleng­zauva, Lalruatliana, Zahmingliana, HC Lal­malsawma leh nominated member Rodingliana leh Kawlremthanga te an awm bawk.

Thutiam lak zawh hian SHC CEM Lalthlamuana Hmar chuan, an mawh­phurhna lian ber chu an hun chhunga inthlan buatsaih hman a nih thu sawiin, "Kan bial hi bial hmasawn lo tak a nih avangin member-te'n bial hmasawnna atan theihtawp an chhuah a ṭul," a ti.