Rua project lian kan kalpui dawn - CM Zoramthanga

Chief minister Zoramthanga chuan nimin khan Thingsulthliah community hall-a sorkar thar lawmna inkhawmah thu sawiin, Mizoram mipuite eizawnna ngêlnghet dinpui an an tum thu leh rua procjet lian tak an kalpui dawn thu a sawi.

Zoramthanga chuan, mipuite eizawnna ngêl­nghet dinpui an tum thu sawiin, "MNF-in kan goal chu Zoram hi mipuite rethei loa an awm theihna tura din chhuahtir a ni. Thlai chi hrang hrang hmanga eizawnna siamsak bakah rua project lian kan kalpui dawn. SEDP kalpui turah hian khua leh veng tinah society system-in kan kal dawn a ni," a ti.

Chief Minister Zoramthanga chuan, ngaihtuahna chi dang nen Mizoram thlak danglam an tum tih sawiin, "NEDP-a sum an dah kha ṭul kan tih lem loh a tam hle a, sorkar hmasa nen khan kan ngaih pawimawh a inang lo nasa hle. Pawisa kan dah duh dan pawh a inang lo nasa hle dawn a ni," a ti. Mipuite'n neitu thinlung an put a ngai hle tih sawiin, "Pawisa a thlawna dawn ngawt ni loin kan thawk ang a, a hlâwk ang a, he ram hi ram intodelhah kan siam thei ang," a ti bawk.

Bialtu MLA R Lal­zirliana, Power & Elec­tricity minister ni bawk chuan, Chief Minister-in, 'Mi sawisel hman kan ni lo, kan thawk char char mai dawn a ni' tia a sawi chu ropui a tih thu sawiin, "Rim takin hna a thawk nghal char char a, thil ti tak tak a nih avangin sorkar officer-te pawhin an pal mai mai dawn lo tih a chiang," a ti a; a zawna kum 25 MLA-a thlan tlin a nih avangin a lawm thu a sawi.