State level Youth Parliament neih a ni

National Service Scheme (NSS) chuan nimin khan Aijal Club-ah state level Youth Par­liament an buatsaih. He hunah hian college zirlai, district level-a ti ṭhate thupui thlan sa hmangin an intihsiak a, Candle Vanrempuii, Pachhunga University College (PUC) pakhatna a ni.

Youth Parliament 2019 hi State NSS officer cum deputy secretary Dr Zirlianngura'n a kaihruai a, Sports & Youth Services secretary Lalthangpuia Sailo khuallian a ni. Khuallianin thu a sawi bakah, NYKS state diredctor Sayed Ali-a'n thu a sawi a, NSS Cell programme coordinator Prof. P Rinawma'n inlawmna thu a sawi bawk.

State level Youth Parliament-ah hian Aizawl district (Aizawl, Champhai, Kolasib leh mamit district-te) leh Lunglei district (Lunglei, Serchhip, Lawngtlai leh Siaha district-te)-a intihsiaknaa ti ṭha zual pathum ve ve an inel a; PUC zirlai Candle Vanrempuii pakhatna niin, PUC zirlai vek Lalnunpuia Renthlei pahnihna a ni a, pathumna chu C Vanlalruati, Lunglei College a ni.

Youth Parliament hi sorkar laipui ruahman angin India rama state leh union territory zawng zawngah a ruala neih a ni a; state level-a ti ṭhate chu February 23-24, 2019 chhunga New Delhi-a National Youth Parliament-ah an state ṭheuh aiawhin an tel ang.