Zu zawrh tihtawp kan tumnaah Hnungtawlh kan tum lo - Beichhua

Excise & Narcotics department (END) minister Dr K Beichhua chuan, zu zawrh titawp tura hma an laknaah sorkar chu hnungtawlh an tum loh thu a sawi. 

Nimina Rangvamuala END Outpost hawnnaah thu sawiin Dr K Beichhua chuan, dan hnuaiah mi zawng zawng kan awm vek avangin sorkarin dry day a puan Gauhati High Court-in a stay chu palzam a thiang lo tih a sawi a, "Sorkar a lawm kan nih tih ngawt theih a ni lo. Kan duh dan chu dry day puang chho zelin, session hmasa berah dan siam a, zu zawrh tihtawp a ni," a ti.

END Minister chuan, session hmasa berah zu zawrh tihtawpna tur Bill an put luh tur thu sawiin, "Zu zawrh tihtawp hi sorkar thil tum zinga pawimawh ber a ni. Hemi atana kan hmalaknaah hian kan hnungtawlh dawn lo," a ti a; lungrual taka ruihhlo do tlânpuiah Mizo mipui a sáwm. 

Dr K Beichhua chuan, zu leh ruihhlo dangin Mizoram a rún mek tih sawiin, "Khawtlang a rûm a, kohhranin an tuar a, tlawmngai pawlte'n mutmu an tuah hman lo a, nu leh pate an mangang a ni. Ram veitute tan chuan awm hle hle theih a ni tawh lo. Kan awm hle hle thei dawn bik em ni tih i ngaihtuah ang u. Ruihhlo do hneh tur chuan sorkar ringawt a tawk lo a, ṭanho a ngai," a ti. 

END outpost hawn inkhawm hi END secretary KT Beicho-a'n a kaihruai a, Central YMA vice president R Lalngheta pawhin thu a sawi. Rangvamual END outpost atan hian mi in luah hawh a ni a, officer pakhatin hoin, a ṭul angin thawktu dah belh zel tum a ni.