Press tour-ah Meghalaya CM an kâwm

Meghalaya-a press tour hmanga zin mek Mizoram Journalists' Association (MJA) member pakuate leh IPRO pahnihte chuan, nimin khan Meghalaya chief minister Conrad K Sangma a chenna bangla-ah an kâwm a, Shillong Mizoram House assistant resident commissioner Joseph Lalchhuanawma'n a ṭawiawm.

MJA team leader Malsawmsanga, IPRO chuan, Mizoram sorkar tirha press tour neih a nih dan a sawifiah a; Conrad Sangma chuan, Mizoram journalist-te'n Meghalaya an tlawh chu lawmawm a tih thu sawiin, Mizoram pawh ram mawi tak, khualzin mite tlawh duh tak tur nia a hriat thu a sawi.

Conrad Sangma chuan, Meghalaya-ah chuan tourism chungchangah sorkar che hmasa loin, mipuiin hma an hruai a, sorkar puih tlak khawpa hma an lak hnuah sorkar chu a che chhuak ṭhin tih a sawi a; Meghalaya sorkarin tourism huangah cheng vbc. 35 sêngin nasa zawkin hma an la tih sawiin, "Mipuiin anmahniin hma an la ang a, sorkar chuan tourism thil - building emaw infrastructure lam a khawih dawn lo a, mimal hmalaknaah a dah a, ṭanpui an ngaih chuan kan pui ang," a ti.

Press tour-a kalte hian February 6, Nilaini khan nilengin Meghalaya state khawthlang lam an fang a, Asia rama khawfai bera media ṭhenkhatin an chhàl mek Mawlynnong bakah, Bangladesh ramria border trade kalpuina Dawki khuate pawh an tlawh. Nimin khan hmun dang an tlawh leh bakah, Shillong-a YMA hruaitute nen an inkâwm bawk. 

Meghalaya Chief Minister hnenah hian MJA member-te chuan Mizoram sorkar diary, calendar, MLA-te hlimthla tarlanna - Choice of the People leh khiangkawi ipte an hlan a ni.