Zirtirtu sang khat vel lâk a ni dawn - School Education Minister
Federation of Mizoram Government School Teachers (FMGST) chuan nimin khan Dawrpui Multipurpose Hall-ah conference vawi khatna an hmang a, School Education minister Lalchhandama Ralte khuallian a ni. Minister chuan, zirtirtu sang khat vel lâk a nih dawn thu leh MPSC kaltlang loin, contract leh muster roll-a lak phawt a, a hnua dah ngheh theih tura tih tum a nih thu a sawi.
Conference hi FMGST president H Lalthlamuana'n a kaihruai a; Lalchhandama Ralte chuan, sorkar department lian berte zinga mi ni si, Education Service Rules a la awm lo chu thil zahthlak a nih thu sawiin, "FMGST-in rules tihhlawhtlin a nih theihna atan hmachhawp in nei thei hi a lawmawm hle. Service rules hi buaipui mek a ni a, neih thuai tum a ni," a ti.
Lalchhandama Ralte chuan, transfer rules a awm loh avangin Education-ah duh reng vang ni loin politics a inrawlh tih sawiin, "Hmun kilkhawra awm ngai an awm deuh char char a, khawpuia awm ngai an awm deuh reng bawk. Chung avang chuan politician-te inrawlhtir an ni ṭhin," a ti a; service rules a awm chuan transfer rules pawh a awm dawn avangin harsatna a sutkian tur thu a sawi.
Zirtirtu indaih lohna a nasat thu sawiin Minister chuan, "Zirtirtu sem rual tur pawhin a strength a tlem. Post ruak hnawhkhah loh a tam. Zirtirtu hi sang khat dawn kan la thar dawn. MPSC-a kan pek chuan an buai a, department zawng zawngin hna lak tur kan pek khawm avangin an ti rang thei lo. A theih chin chinah contract leh muster roll-a lak kan tum phawt ang, perfomance based-a dah ngheh theih turin," a ti.
FMGST Conference-ah hian resolution panga pass a ni a; chawhnuah hruaitu thar thlan niin, president-ah Rosangzuala Ralte, general secretary-ah Hmingchungnunga leh treasurer-ah V Lalengzami te an thlang.
FMGST resolution
1. Mizoram School Education Directorate hi Elementary leh Secondary Education-a ṭhen hran ni rawh se.
2. Mizoram School Edcuation Service Rules nei tura hmalak mek hi tihpuitlin thuai ni rawh se.
3. Teachers' quarters kan neih theihna atan sorkarin hma la rawh se.
4. CCE kan hman mek hi ennawn hi rawh se.
5. Mizorama education quality tlahniam mek nia lang hi siamṭha turin zirtirtute'n mahni thawhna ṭheuhah ṭan lak ni rawh se.