KHAWTHLIR

New Delhi-a MLA Orientation Training neia kal Zoram Peoples' Movement MLA-te chuan cancer vanga Max Hospital, Delhi-a enkawl mek deputy chief minister Tawnluia chu February 6, Nilaini khan an kan. ZPM MLA-te chuan Tawnluia chu dam ṭha leh thuai turin duhsakna an hlân a; dam taka Mizoramah a haw a, ram leh hnam rawngbawlna a chhunzawm leh thuai theih nan ṭawngṭaipui turin Mizoram mipui an sáwm bawk.

CZ Higher Secondary School, Kolasib-a pawl 11 zirlaite chuan nimin khan Kolasib District Hospital-ah thisen unit 15 an pe a, a petute mipa 12 hmeichhia pathum an ni. Siaha-a CDPO leh thawktute'n Diaha District Hospital-ah thisen unit 13 an pe bawk.

MZP hruaitute chuan February 6, Nilaini tlai khan chief minister Zoramthanga chu a pisaah an kâwm a; MZP hmalakna leh hmachhawpte an hrilh bakah, Education budget, zirtirtu indaih lohna, zirtirtu lak, Continuous and Comprehensive Evaluation (CCE), School Education directorate pahnih (Elementary leh Secondary)-a ṭhen, Mizoram Education Service siam leh Mizoram ramri hrûla sipai dah belh chuangchangte an thlen. MZP thu thlente chu ngaihtuaha hmalak a nih tur CM chuan a sawi a ni.

Traffic SP chuan thupek chhuahin, Mission Veng Presbyterian biak-in aṭanga Mission Vengthlang kâwnah February 6-20 chhung zan dar 9 aṭanga zing dar 5 chhungin pipe phûm hna thawh tibuai thei tura kawngpui sira lirthei leh bungrua dah a khap. Mission Veng area-ah tui pipe phûm hna hun tiam chhunga thawh zawh hman a nih loh avangin hna thawh chhunzawm a ngai niin a tarlang bawk. 

Nimin khan Serchhip DC conference hall-ah Loan Camp (Mega MSME Campaign) buatsaih a ni a, khuallian DC Sangchhin Chinzah, Serchhip bawrhsap chuan, loan pûkte chuan rulh leh ngei tur a ni tih hre chung leh an pûk chhan ang ngeia dik taka hmang turin a chah. He hunah hian MUDRA, PMEGP leh UDPA Department, DAY-NULM hnuaia SEP loan sanction order sem a ni.