Chak zawka hmasawnna hna thawk turin Sorkarin Committee 14 a din thar
Mizoram sorkar chuan tun hnai khan Committee chi hrang hrang an siam thar a; chu'ng Committee-ahte chuan chairman atan minister-te leh vice chairman atan MLA-te leh MLA hluite dah an ni a, secretary atan sorkar department secretary-te ruat an ni.
Committee din a nih thu leh hotute ruat chungchangah hian General Administration department (GAD) chuan February 7, 2019 khan notification a tichhuak a; Committee nihphung tur leh an hnathawh dan tur (terms of reference)-te chung changah chuan hriattirna la chhuah leh tur a ni.
Chief minister Zoramthanga chuan hmasawnna hnathawhnaah board system-a kal a nih tur thu hi lo sawi tawh a, "Hmasawnna hnathawh dial dial a ni ang. Ngaihtuahtu a tam chuan ngaihtuahna a fing a, board chuan hnathawhte a en zui ang a, chu chuan eiruknate a veng dawn," a ti.
Hmasawnna hnathawhnaah board hrang hrang an siam turah hian tlawmngai pawl aiawh leh a ṭul chuan party dang a mite pawh an telh tur thu sawiin Zoramthanga chuan, "Kan vaiin kan hnatlang dawn a ni," a ti a; minister-te'n finchhuahtu ṭha an nei dawn thu a sawi.