Private hospital-ah thisen man la lo turin Sorkarin ṭan a la zel - Health minister

Health & Family Welfare minister Dr R Lalthangliana chuan, thisen sawng­bawlna senso (blood processing fee) lak ṭhin tihtawpin private hospital a huam theihna atan hmalak chhunzawm a nih thu a sawi.

Health Minister hian nimina a bial khaw hrang hrang a tlawhnaah, January 10, 2019-a Council of Ministers ṭhu­khawmin thisen sawngbawlna senso unit khata Rs. 550 lak ṭhin chu sorkar damdawi-in bik atan tihtawp a ni a, notification pawh chhuah nghal a nih thu a sawi a, "Hun lo kal zel turah sum dinhmun azirin zau zawka private hospital-te pawh huam thei tura hmalak chhunzawm a ni," a ti a; sorkar doctor eng emaw zat lak belh turin MPSC-ah hmalakna a kal mek thu a sawi. 

SEDP chungchang sawiin Dr R Lalthangliana chuan, "SEDP hmalaknain a tum ber chu miretheite dinhmun chawi­kân, eizawnna nei lote hnena eizawn­na ngaihtuahpui, intluktlân lohna (inequality) tihtlemte a ni," a ti a; SEDP chu a thlawna sum sem ngawt tur ni loin, inkaihhruaina mumal tak nen project based-a kalpuiin, hna (trade) hrang hrang­ah training mumal tak nen ṭanpuina pek chhuahna tur a nih thu a sawi.

Dr R Lalthangliana chuan, khaw hrang hrang mipuite'n hmasawnna atana an mamawh an sawite chu tihhlawhtlin ngei a tum thu sawiin, "Mipuite pawhin an mawhphurhna hre reng a, sorkar hmalakna an ṭawiawm a pawimawh. Mipui leh sorkar official-te ṭawiawmna nen ka mawhphurhnate ṭha taka hlen chhuah ngei ka tum," a ti a; mipuite chu an mamawhte inthlahrung loa a hnena thlen ṭhin turin a chah.

Minister hi Commerce & Industries director J Hming­thanmawia, Health principal director Dr F Lallianhlira, PWD chief engineer (Roads) R Lalrin­tluanga leh Health director pahnih Dr H Lalchungnunga leh Dr T Lalhmangaihi ten an ṭawiawm a ni.