Chief minister-in NBM hotute kâwm
Chief minister Zoramthanga chuan nimin khan CMO conference hall-ah National Bamboo Misison (NBM) hotute a kâwm a; Mizorama Bamboo Mission kalpui dan leh hmalak zel dan tur a sawipui.
Chief Minister chuan, maua innghat industry hrang hrang Mizoramah a awm tawh tih sawiin, "Mau hmanga thil siamte hi Mizoram páwna thawn chhuakin, mau hi eizawnna kawng ṭha tak siam theihna atan environment atana thil pawi ni si lo a ni. Chutih rualin, industry-a hman theih chi mau quality ṭha tam tham tak thar chhuah a ṭul," a ti.
NBM state mission director Lalthangliana Murray chuan Mizoramin NBM a kalpui dan sawiin, "Sorkar laipuiin kalphung a duan ang chiah chiaha state-te kal tura beisei kan nih vangin, hmarchhak tlangram state-te'n mau hmun siam kawngah sum min pek duh angin kan khamkhawp lo," a ti a; kum 2018-19 chhunga hmalakna tur duan saah mau thar chhuah tipung tura beihpui thlak bakah, khawl ṭha lak luh te, kudam sak belhte leh pawimawh dang a tel thu a sawi.
SFR 2017 report-a a lan danin, tunah hian Mizoram pumpui aṭanga 15.49% chu mau hmun niin, chu sq. km 3,267-a zau a ni a, reserved forest area-a mau awm zawng zawng zat chu nuai 7160-a chhût a ni.