MKHC ṭawngṭai thupuiah CAB a langsar

Mizoram Kohhran Hruaitu Committee (MKHC) chuan zanin Inrinni zanah emaw, naktuk Pathianni-ah emaw kohhran inkhawm­ah ram leh hnam tana ṭawngṭai turin tualchhung kohhran tinte an ngen.

Nimina MKHC thuchhuah chuan, Mizoram kohhran hrang hrangte hnena February 16, 20190-ah ram leh hnam tana ṭawngṭai turin ngenna tihchhuah a ni tawh tih a tarlang a, "Citizenship (Amendment) Bill, 2016 hi Parliament (Rajya Sabha)-ah February 12, 2019 hian an pharh dawn nia a lan tâk avangin, hemi hma, February 9 (Inrinni) zan emaw, February 10 (Pathianni)-ah emaw mahni remchan dan ang anga urhsûn taka ṭawngṭaina turin Mizorama kohhran hrang hrangte kan ngen nawn leh a ni," a ti. 

1.    Kan ram leh hnam him nan leh hma a sawn theih nan.

2.    India ramah sakhaw zalenna kan neih a, zalen taka Pathian chibai kan bûk zel theih nan.

3.    Citizenship (Amendment) Bill, 2016 hi kan ram leh sakhaw tan a him lo a, Bill hi pass a nih lohna turin.

4.    Citizenship (Amendment) Bill, 2016 pass a nih lohna tura hma latu, ram hruaitu zawng zawngte tan.

5.    Kan ram hruaitute'n dik tak, fel tak leh Pathian zah taka ram an hruai zel theih nan.