MNF hotute an ze ngai chhuah ṭanah puh

ZPM senior vice chairman Dr Kenneth Chawngliana chuan nimin khan ZPM pisaa inkhawmah thu sawiin, MNF hotute'n an zia an la thlak lo niin a sawi a, "MNF sorkar thla hnih pawh la pumhlûm lo chuan Zoram mipui leh kohhrante'n an nin em em an ze pangngai, 'Ram hlui zia' chhawm nun an tum leh ṭan ta," a ti.

Dr Kenneth Chawngliana chuan, School Education minister Lalchhandama Ralte-in February 7, 2019-a Federation of Mizoram Govt of School Teachers (FMGST) conference-ah, 'Zirtirtu sang khat dawn kan la thar dawn. MPSC-a kan pek chuan an buai a, department zawng zawngin hna lak tur kan pek khawm avangin an tirang thei lo. A theih chin chinah contract leh muster roll-a lak kan tum phawt ang a, perfomance based-a dah ngheh turin,' tia a sawi chu thil dik lo tih tumna a nih thu a sawi.

School Education Minister thusawi chu party mite chauh duhsakna (favouritism & nepotism) hmanga zirtirtu lâk an tum thu a sawinaa an ngaih thu sawiin Kenneth Chawngliana chuan, "Induhsak bikna awm loa sorkar hna la tura din MPSC palzûtna leh ualau taka an thuneihna chhuhsak tumna a ni bawk," a ti.

Dr Kenneth Chawngliana chuan, Congress sorkar lai leh MNF sorkar laiin MPSC-ah member a nih ve tawh thu sawiin, "MNF sorkar hotute chu MPSC hnathawhah inrawlh an tum fo a, mahse, khatih laia MPSC chairman Pu M Lalmanzuala hoa dikna kan kenkawh tlat avangin tumah an inrawlh thei lo," a ti a; tuna MPSC Chairman leh member-te pawh dikna kenkawh duhtu an nih avangin, MPSC kaltlanga zirtirtu sang chuang lak a nih chuan MNF party-in an duhsakte an thun tam thei dawn loa an hriat avangin zirtirtu contract leh MR-a lak a tum ta mai nia a ngaih thu a sawi.

ZPM Sr. Vice Chairman chuan, zirtirtu sang chuang lak turah MPSC kaltlang ngeia lak a nih theih nan YMA, MZP leh MSU hotute chu sorkar nawr turin a sáwm nghal bawk a ni.