KHAWTHLIR

Chief Secretary chuan thuchhuah siamin, Mizoram sorkar pisa kai hun chu February 18, 2019 aṭangin zing dar 9 aṭanga tlai dar 5 thleng a nih dawn thu a tarlang. New Delhi, Kolkata, Mumbai leh Bengaluru-a Mizoram House-a pisa kai hun erawh zing dar 9:30 aṭanga tlai dar 5:30 thleng a ni ang.

Social Defence & Rehabilitation Board chu nimin khan an chairman Dr K Beichhua, Social Welfare minister hoin a pisaah an ṭhukhawm. Dr K Beichhua chuan, ruihhlo do kawnga sorkar hmalakna thlawp turin member-te a chah. Meeting-ah hian ruihhloin kan ram a tihchhiat dan te, ruihhlo dona kawnga sorkar hmalak tawh dante leh hmalak zel dan tur sawiho a ni.

INTACH Mizoram Chapter convener P Rohmingthanga chu tun hnai khan New Delhi-a INTACH state convener-te conference-ah a tel a, Archaeological Survey of India (ASI) hotute a hmu nghal. P Rohmingthanga hian pipute sûlhnu pawimawh - Farkawn, Dungtlang, Lianpui leh Lungphunliana mite humhalh tura an lo buaipui ṭhin leh chumi atana rawtna, ASI, Guwahati-in kum 1975-a an lo siam tawh tihpuitlin dan turte a sawipui a ni.

MJA, Mamit District leh CL Filling Station-te chuan nimin khan CL Filling Station, Mamit Bethel Vengah free clinic an buatsaih a, mi 105 inentirin, Dr Lalsiama Tualzik leh Dr Lalrinfela ten damlote an en. Inentir puitling zingah tha ná, kâwng ná leh pum ṭha lo an tam a, naupang zingah hritlang leh kawṭhalo an tam ber thung a; damlohna neite hnenah an mamawh ang damdawite a thlawna pek a ni.

Mizoram College of Teachers' Association, Aizawl West College Branch-in lehkhabu an buatsaih, 'Selected Issues of Current Trends in Mizoram' tih chu nimin khan Aizawl West College auditorium-ah IPR minister Lalruatkima'n a tlangzarh. Lehkhabuah hian mi 11-in zirbingna article an ziah a awm a ni.