MNF-in councillor tharte an lâwm. 'Covid-19 zawhah malsawmna period a lo chhuak dawnin ka hria' - Zoramthanga

Inkhawm hi MNF vice president Vanlalzawma'n a kaihruai a; Zoramthanga chuan, van boruak, lei chung leh lei hnuai malsawmna Pathianin Mizoram a pe dawna a hriat tlat thu sawiin, "Covid-19 zawhah malsawmna period a lo chhuak dawnin ka hria. Chutih hunah chuan Zoramah malsawmna a awm ang. Thlarau lama harhna pawh a thlentir ka ring," a ti.

MNF President chuan, MNF chu Pathian leh kan ram tan titu an ni tih sawiin, "He thuthlung hi MNF chuan kan kalsan thiang lo. MNF zin kawng hi thawnthu phuah thiam takin, phuah vannei lutuk an tih tura an phuah ang hialin, awihawm loh khawpa makin Pathianin min hruai a ni," a ti a; fel lohna tam tak nei mah se, 'Pathian leh kan ram tan' an tih tlatna chu Pathianin an felnaah a ruat niin a sawi.

Congress party chungchang sawiin Zoramthanga chuan, "Central-a Congress president ni rei ber Sonia Gandhi chuan Kristian a nihna phatsanin a fapa Rahul Gandhi tan Lord Krishna malsawmna a dilsak aṭangin tlâkchhiat lam an pan a, engmah an ni tawh lo. Mizoramah pawh Congress party chu zu an zawrh avangin an chhe vek tawh," a ti.

MNF President chuan, central leh Mizoramah Congress an sorkar laiin an duh duha an chêt thu sawiin, "Kan sorkar laiin chhan sawi loin President's rule-ah min dah tawh. Kum 1989 inthlanah vote tla an rigged nasa hle, Serchhip biala ballot box chu a tuamtu pawh a awm lo. Kum 2013-ah EVM a nih pawhin an rigged tho," a ti a; Delhi-a Congress an sorkar loh hnuah Mizoramah pawh Congress an che thei tawh lo niin a sawi.

 

Zoramthanga chuan, ZPM chu an lian fuh thei lo nia sawiin, "ZPM unaute hi an buaithlakna ber chu kalphung an ti thar ngun lutuk hi a ni. Tui anga nghet thei lo hi Zoram mipui hian an duh tawh lo. Sawifiah an harsa khawp mai," a ti.

MNF senior vice president Tawnluia pawhin thu sawiin, AMC sorkar chu state sorkar nen pafa anga lungrual taka kal tur an nih thu a sawi a, "State sorkarin a ṭul ang angin a puibàwm dawn. Subject la pek lohte pek an nih theihna atan kan chhawmdawl chho zel dawn a ni," a ti a; an manifesto-te tipuitling turin theihtawp chhuaha hma an lâk dawn thu a sawi.

MNF aṭanga AMC councillor atana thlan tlinte chu - Ward I-ah Lalrinenga Sailo, Ward II-ah Lalringliana, Ward IV-ah Laltlanzova Khiangte, Ward VI-ah John Zosangliana Ralte, Ward VII-ah Vanlalneia, Ward IX-ah B Lalawmpuii, Ward X-ah Chuau­zikpuii, Ward XI-ah H Zonunsanga, Ward XII-ah R Thanglura, Ward XIII-ah Lalfak­zuala Chenkual leh Ward XVII-ah David Zohmangaiha te an ni.