KHAWTHLIR

Tourism department chuan nimin khan hriattirna a tichhuak a; The Mizoram Registration of Tourist Trade Act, 2020 hnuaia tourism trade hrang hrang - hotel, restaurant, tour operator, travel agent, etc. neitu leh kalpuitute chu Tourism department hnuaiah inziak lut vek turin a ngen. Covid-19 avangin registration fee 75% ngaih­hnathiamna pek a nih dawn thu a tarlang bawk.

Tennis trainer Calvin Lalremsiama, NIS coach ziah ‘Tennis zirna’ tih lehkhabu chu nimin khan Dr Vanlalṭanpuia, MLA-in Mizoram Youth Commission conference hall-ah a tlangzarh. Lehkhabu hi phek 134-a chhah a ni a, tennis khelh dan kalhmang chi hrang hrang ziah a ni.

Women & Child development leh Champhai District Child Protection Unit (DCPU) bultumin nimin khan Champhai RD Block Level Child Protection Committee an ṭhukhawm a; legal cum probation officer Lalsiammawii, social worker R Vanlalsawmi leh protection officer Vanlalhruaii ten kalkhawmte chu naupang enkawl leh venhim dante an hrilhfiah a ni. 

Traffic SP Rodingliana Chawngthu chuan thupek chhuahin, Aizawla lirthei intlàn chhâwk hun zing dar 9 aṭanga tlai dar 4:30 ni ṭhin chu zing dar 9 aṭanga tlai dar 5:30 inkarah thlak a nih thu a tarlang. Thupek hian kumin February 22 aṭanga October 15 thleng a huam ang.

Synod Higher Secondary School NSS unit chuan nimin khan an sikulah Civil Hospital, Aizawl tan thisen unit 69 an pe a, a petute mipa 53 leh hmeichhia 16 an ni.

State Referral Hospital-ah nimin khan Covid-19 vei hmuh thar mi pakhat dah luh a ni a, ani nen hripui vei vangin mi paruk enkawl mek a ni. SRH-ZMC Bulletin tarlan danin, mi paruk zinga pakhat chu ICU-ah awmin, ventilator hmantir zui zel a ni a, mi dang zawng Isolation ward-ah awmin, harsatna lian tham an nei lo.