COVID-19: Mizoram dinhmun Hripui vei mi 6 hmuh belh a ni
February 18, Ninga-ni khan Mizoramah Covid-19 vei mi paruk hmuh chhuah a ni a, tualchhunga kái chhâwng vek niin, kumin February thla chhunga hripui vei hmuh chhuah tam ber ní a ni. Nimin khan Lawngtlaia hripui laka fihlim tawh mi pakhat chhuahtir a ni thung.
Covid-19 vei hmuh thar parukte chu Rapid Antigen Test hmanga hmuh chhuah an ni a; ZMC laboratory leh TrueNAT-PCR hmanga swab sample endik zingah hripui vei hmuh chhuah a ni lo.
February 18 hi tun thlaa hripui vei hmuh chhuah tam ber ní a ni a, a hmain pali aia tam hmuh belh a ni ngai lo. February ni 3, ni 13 leh ni 14-ah Covid-19 positive hmuh chhuah a ni lo a, tun thla chhungin positive mi 33 hmuh belh a ni tawh.
Mizoramah Covid-19 vei mi 4,405 hmuh chhuah a ni tawh a, mipa 3,221 leh hmeichhia 1,184 an ni. Nimin tlai dar 5 thleng khan mi 4,373 (99.27%) chhuahtir an ni tawh a, mi 10 (0.23%) thi tawhin, enkawl mek mi 22 (0.50%) an awm.
Ningani khan ZMC laboratory-ah swab sample 20, TrueNAT-PCR hmangin Lunglei, Saitual leh Hnahthial district-ah sample 35 leh RAT hmangin district pariatah sample 968 endik a ni a; sample endik zawng zawng chu 1,023 niin, chu'ng aṭanga Covid-19 positive hmuh chhuah paruk chu 0.58% a ni.
February 18, 2021 thlenga Mizorama swab sample endik tawh zat chu 2,24,371 a ni a, chu'ng aṭanga Covid-19 positive mi 4,405 chu 1.96% a ni. Hripui vei hmuh tawh zinga mi 2,093 chu Mizoram chhunga kái an ni a, mi 2,312 chu Mizoram páwn aṭanga an rawn luh hnua hmuh chhuah an ni thung.
Mizorama district 11 zinga district paruk - Siaha, Kolasib, Serchhip, Mamit, Khawzawl leh Hnahthial district-ahte Covid-19 vei an awm tawh rih lo. District panga - Aizawl (9), Lunglei (2), Champhai (2), Lawngtlai (8) leh Saitual (1) district-ahte chiah hripui vei an awm rih a ni.
Covid-19 vei hmuh tharte
Ramhlun South - 1: Hmeichhia kum 19, nau nei tura a kalna private hospital-a hmuh chhuah, hri kàina hriat loh, symptom nei lo.
Champhai Venglai - 1: Mipa kum 25, tualchhunga kái, hri kàina hriat, symptom nei lo.
Lawngtlai-III - 1: Hmeichhia kum 17, zirlai, hostel luh dawn vanga endik, kàina hriat loh, symptom nei lo.
Lawngtlai Vengpui - 1: Hmeichhia kum 15, zirlai, hostel luh dawn vanga endik, kàina hriat loh, symptom nei lo.
Thingfál - 1: Hmeichhia kum 17, zirlai, hostel luh dawn vanga endik, hri kàina hriat loh, symptom nei lo.
Ṭialdawnglung - 1: Mipa kum 18, zirlai, hostel luh dawn vanga endik, hri kàina hriat loh, symptom nei lo.