AMC mayor tur Lalrinenga Sailo

MNF senior vice president Tawnluia hoa nimina MNF party aṭanga AMC councillor atana thlan tlinte ṭhukhawm chuan AMC mayor atan Ward-I aṭanga thlan tlin Lalrinenga Sailo an ruat.

Ṭhutkhawmah hian, Aizawl deputy mayor atan Ward XII-a thlan tlin R Thanglura ruat a ni a; executive councillor atan Ward II-a thlan tlin Lalringliana, Ward IV-a thlan tlin Laltlanzova Khiangte, Ward IX-athlan tlin B Lalawmpuii leh Ward XI-a thlan tlin H Zonunsanga ruat an ni bawk.

Aizawl mayor tur Lalrinenga Sailo hi AMC inthlan hmasa ber 2010-ah Ward I aṭangin thlan tlin a ni tawh a, kum 2015 inthlanah Ward I chu hmeichhe ward a nih avangin Ward V-ah ding mah se, a tling lo. Kumina inthlanah Ward I aṭang vekin thlan tlin nawn a ni ta a ni.

Deputy mayor tur R Thanglura chu kum 2015-a AMC inthlanah Ward XII aṭanga thlan tlin a ni a, kuminah hian a ward ngaiah thlan tlin leh a ni. Executive councillor tura ruat mi palite pawh kum 2015-a thlan tlin tawh vek niin, kuminah hian an ward ngaiah vek thlan nawn an ni a; an zinga mi Lalringliana chu AMC term liam ta (2015-2020) chhunga deputy mayor a ni.