ZPM-in councillor tharte an lawm ZPM-in final kan lut ta - Lalduhoma

Zoram Peoples' Movement (ZPM) party chuan nimin khan an pisaah Aizawl Municipal Corporation (AMC) inthlana ZPM candidate thlan tlinte lawmna inkhawm an buatsaih. Thu sawitu ZPM leader Lalduhoma chuan, inthlan leh atan ZPM-in final an luh thu a sawi.

Inkhawm hi ZPM president mawhphurhna la mektu K Sapdanga, vice president-in a kaihruai a; Lalduhoma bakah, councillor atana thlan tlinte'n thu an sawi a ni.

ZPM Leader chuan, AMC inthlanah an party-in councillor paruk an nei thei chu lawmawm a tih thu a sawi a, "Kum thuma upa ZPM-in kum 136-a upa INC leh kum 60-a upa MNF party-te kan khing a, kan vawi khat hmachhawnaah seat paruk kan la leh seat pariata pahnihna kan ni hi a lawmawm tak zet a ni," a ti a, tling zo lote chu party tan thâ thlah loa ṭan la zel turin a sáwm.

Lalduhoma chuan, an chakna chu mipui chakna a nih thu sawiin, "Kan tlinna leh chak lohna bialah pawh party mi ni lo, min duhsaktute avangin vote tam tak kan hmu a ni," a ti a; Aizawl mipui chungah ZPM an lawm tak zet thu a sawi.

Ruling party thlaktu an nih dawn thu sawiin Lalduhoma chuan, "Kum 2018-a MLA inthlanah pahnihna kan ni a, tunah AMC-ah pahnihna kan ni leh bawk. Semi final-ah kan chak ve ve a, tunah chuan final kan lut ta. Kum 2023-a MLA inthlanah chuan MNF vs ZPM a ni dawn a, khawfîng a chat dawn hnai a, khuan hmasak a khuang ta niin ka hria," a ti. 

ZPM Leader chuan, Aizawl mipuiin AMC inthlan ngai pawimawh lehzual se a duh thu sawiin, "Vote hi 75% vel tal tla se chuan kan chak ngei ka ring. Chutih rualin, therhloin awmzia a la nei hi a pawi ka ti. Chutiang hmanrua hmang chuan Minister leh MLA-te'n hmun ṭhenkhatah hma an la a ni," a ti a; therhlo hmanga mi zalenna rahbehna chu reh tawh se a duh thu a sawi.

Ward XVIII-a thlan tlin Malsawmzuala Ralte, ZPM Ṭhalai president pawhin thu sawiin, AMC-a ro an rèlna turah party mite kaihhruaina leh thlàwpna an mamawh dawn thu a sawi a, an party mite leh Aizawl mipuite chu lungrual taka thawhpuiah a sáwm. 

Malsawmzuala Ralte chuan, "A dik leh ṭha piah lama thil awm thei lakah min véng ula, hmingṭha tluana kan kal theih nan min kaihruai ang che u," tiin an party mite a sáwm a; ZPM leader Lalduhoma tawrhna chu an tan malsawmna a ni tih sawiin, "A thil tawn avanga mipuiin min khawngaihna zarah tun hi kan thleng thei a ni," a ti. 

ZPM aṭanga AMC councillor atana thlan tlinte chu - Ward III-ah C Lalchhandami, Ward VIII-ah Christina Roluahpuii Sailo, Ward XIV-ah Ramthanzauvi, Ward XVI-ah R Lalawmpuii, Ward XVIII-ah Malsawmzuala Ralte leh Ward XIX-ah Baryl Vanneihsangi te an ni.