Councillor-te kum chawhrual 46.63 Master degree nei mi paruk an awm

Aizawl Municipal Corporation (AMC) inthlan zawh tâka counci­llor atana thlan tlin mi 19-te kum chawhrual chu 46.63 a ni a; mi 19 zinga parukin master degree an nei.

AMC councillor zingah a naupang ber chu Ward VIII-a ZPM ticket-a thlan tlin Christina Roluahpuii Sailo niin, kum 26 a ni a; a upa ber chu Ward II-a MNF ticket-a thlan tlin Lalringliana niin, kum 66 a ni. Councillor 12 chu kum 50 aia naupang an ni a, a bak pasarih chu kum 50 chung lam niin, chu'ng zinga pahnih chu kum 60 chung lam an ni.

Councillor zingah hian master degree nei paruk an awm a, chu'ngte chu - M.A pali, M.Com. pakhat leh MBA pakhat an ni. Graduate pariat - B.A paruk, B.Sc. pakhat leh B.Com. pakhat an awm a, an zinga pakhat chu B.A a nih bakah B.Th. degree a nei tel.