Hâlpuah khapna bawhzui ṭhate Hnenah lawmthu sawina hlan

Central YMA chuan nimin khan CYMA Hall-ah kum 2020 Krismas leh 2021 kum thar vuatvêta hàlpuah leh hàlmawi khapna bawhzui ṭha vengte hnena lawmthu sawina inkhawm an buatsaih a, Home minister Lalchamliana'n a hmanpui.

Hâlpuah leh hâlmawi khapna bawhzui ṭha veng (YMA branch) thlan chhuahte chu - Muthi Branch, Dinthar Branch, Bethlehem Veng Branch, Bawngkawn South Branch, Khatla West Branch leh Kulikawn Branch-te an ni a; lawmthu sawina thuchei leh Rs. 3,000 ṭheuh hlan an ni.

Inkhawm hi CYMA vice president Lalhmachhuana'n a kaihruai a; Home minister Lalchamliana chuan, hâlpuah leh hâlmawi khap chungchangah kuminah chuan CYMA nen thawkhoin hma taka bul ṭan an tum thu a sawi.

Lalchamliana chuan, YMA awm lo se, Mizo society awm dan tur hriatthiam a har thu sawiin, "Kan ram tana YMA ṭangkaina hi sawi sèn a ni lo, a hlu ka ti hle. PWD nena thawhhonaa kawngpui endikte kha a lawmawm hle a ni," a ti a; theihtawp chhuah zel turin YMA hruaitute a ngen.

CYMA president Vanlalruata pawhin thu sawiin, YMA chu fimkhur taka kal a ṭul thu a sawi a, "Pathianin missionary-te kaltlanga a ro min pekah chuan YMA hi a ropui páwl a ni. Kum hlui thlah zana hâlpuah leh hâlmawi a reh theih nan kum tìr aṭangin bei ila, kan hneh em em ang. YMA chuan ṭha a tih chu a bawhzui chat chat zel dawn a ni," a ti.