Minister Thangtea'n Tlangsang Day a hmanpui

Tripura state chhung, Zàmpui tlangdunga Tlangsang khua chuan Ningani leh nimin khan an khaw kum 107 tlinna - Tlangsang Day an lawm a, nimin khan Health & Family Welfare minister Dr R Lalthangliana'n a hmanpui. Tlangsang khua hi lal Hrangvunga'n Kristian khua ni tura kum 1914-a a din a ni.

Dr R Lalthangliana chuan, khawvel hmun hrang hranga Zo fate inunauna sawh ngheh chu Mizoram sorkarin a tum pawimawh berte zinga mi a ni tih sawiin, "Khawvel ramri kham hian kan inlaichìnna leh inunauna a dâl tur a ni lo a, engtik lai maha inthlahthlam thiang kan ni lo," a ti a; inpumkhatna cháwi nung reng turin a chah.

R Lalthangliana chuan, Zampui tlangdunga Mizo khuate'n taimâkna leh tlawmngaihna an hmingthanpui a, entawntlak an ni tih a sawi a; ṭhalaite chu Zo fate mamawh thiamna pawimawh bik chi hrang hrang ngaihtuah chunga rilru siam turin a fuih.

Health Minister chuan, Covid-19 hripuiin khawvel a tuam mek laiin Mizoram chu India ram state zinga a tuar nêp ber a nih thu sawiin, "A chhan chu Zoram páwna Zo fate'n Mizoram hmangaih taka theihtawp chhuaha min ṭawngṭaisakna rah a ni tih kan hria a ni," a ti.

Minister hian Tlangsang khuaa hun a hman zawhah Behliangchhip khuaa Calvary Healing Centre a tlawh a, oxygen generator a hlàn. Calvary Healing Centre hi ruihhlo ngaite enkawlna hmun (de-addiction centre) atana kohhran leh tlawmngai pawl hrang hrangten kum 2019 a an din a ni.

Dr R Lalthangliana hi Road & Infrastructure Development Board vice chairman H Lalzirliana, MLA leh Mamit DC Dr Lalrozama ten an ṭawiawm a ni.