BJP-in Serchhip bial MLA by-election an chuh dawn thu puang

BJP, Mizoram Pradesh chuan nimin khan an pisaah an party zawm tharte lawmna inkhawm an buatsaih a; an president Vanlalhmuaka chuan, Serchhip constituency-a Assembly by-election chu BJP-in an chuh dawn thu a puang.

Vanlalhmuaka chuan, "BJP, Mizoramin AMC election-ah a vawi khat nan party malin kan chuh ve a, BJP tan hmasawnna ropui tak a ni. Candidate ṭha tak tak kan neihte avangin unit pawh hmun eng emaw zatah kan din thar thei a, party-a lo lut tur lah an awm nual bawk. Serchhip by-election-ah pawh BJP hian a malin kan chuh ve dawn a ni," a ti.

BJP-in kum 2019 aṭanga new enrolment an tih aṭangin AMC huam chhungah member nei lo ang tluk an nih thu sawiin Vanlalhmuaka chuan, "AMC inthlan avangin BJP idealogy leh kalphung puan chhuahna hun ṭha kan nei thei a, kan thusawi hriate'n BJP kalphung an hre ṭan chauh a, an mit a vár tan chauhin ka hria," a ti a; an party mite chu dâwta bul ṭan lo a, a tak chauh buaipui turin a chah.

BJP President chuan, Congress leh MNF party-te tum ber chu, kum 10 dana inlal chhâwk a ni tih sawiin, "Mi dang lian tur hi an hlau em em mai a, party dang lian tur lo vuak thluk nan thu dik lo leh dâwt thu hmanga mipui zirtir an pawisa miah lo. Mahse, state dangin development an neih ang hi kan rama kan neih vena turin theihtawp kan chhuah zel dawn a ni," a ti.

Mizoram BJP tarlan danin, nimina inkhawmah hian MSU dintu K Laldinthara leh zaithiam Alex Lalchhuankima te an lawm lut a ni.