Mizoram Science Centre hmalakna thlirho

Kum 2015-2021 chhunga Mizoram Science Centre hmalakna hrang hrangte nimin khan an hmunah chief scientific officer Dr RK Lallianthanga hoin thlir lêt a ni.

Dr RK Lallianthanga chuan, an thawhhona ṭha avangin kum ruk chhungin Mizoram Science Centre-in nasa taka hma a sawn thu a sawi rualin, hmasawn leh zel tum turin thawktute a fuih a; thawktute chu Science Centre tlawhtute hlim taka lo dawngsawng turin a chah. 

Mizoram Science Centre hi July 26, 2003-ah hawn a ni a, March 2, 2017-ah autonomous government institution-ah Mizoram sorkarin a dah a; tunah hian thawktu nghet 20 leh a nghet loa thawk pali an awm mek a ni.

Kum 2015-2021 chhunga Mizoram Science Centre hmasawnna langsar deuhte chu - Innovation & Space Education Centre din te, 250 KVA transformer bun te, 50 Kwp solar rooftop bun te, a panna kawng leh footpath siamṭhat te, 16" dia Dobsoniam Telescope thar neih te, exhibit item eng emaw zat siamṭhat leh dah tharte a ni. Lungleia Science Centre & Digital Planetarium din mek a ni bawk.