Aizawl bawlhhlawh sawngbawlnaah bawlhhlawh thliar loh paih phal a ni lo
Tuirial Airfield-a bawlhhlawh paih leh sâwngbawlna hmun siam thar, 'Solid Waste Management Centre' (SWMC) chu nimin khan Aizawl Municipal Corporation (AMC) mayor PC Lalhmingthanga leh chanchinbumite'n an tlawh a; Mayor chuan, bawlhhlawh thliar hran loh paih phal a nih dawn loh thu a sawi.
AMC Mayor chuan, SWMC-ah hian bawlhhlawh thliar sa a nih loh chuan phurh luh theih a nih dawn loh thu sawiin, "Chutiang a nih chuan veng tinin anmahni bawlhhlawh paihna tur hmun a hranpaa an ngaihtuah a ngai mai thei. Khawtlang hruaitute'n an veng chhung ṭheuha bawlhhlawhte mumal taka thliar a nih leh nih loh hre chiang turin kan duh," a ti.
PC Lalhmingthanga chuan, SWMC chu kum 2019 tàwp lamah enchhin a nih thu sawiin, "December 2019 aṭangin Aizawla veng 19-in bawlhhlawh an paih ṭan a, February 10, 2020 aṭang hian veng 38 dangin an paih ṭan leh ang," a ti a; veng hrang hrangte chu a tahtawlin paihtir zel an nih tur thu a sawi.
AMC Mayor sawi danin, vawi khata veng zawng zawngin an paih nghal loh chhan chu, tih dan thar, ṭawih thei leh thei lo, plastic leh electronic waste (e-waste)-te in aṭanga thliar sa veka paih a nih tawh avangin a sawngbawl dan tur enchhin phawt a ngaih vang a ni.
Bawlhhlawh paih danah ruahmanna thar kalpui a ni dawn a, thla khata Thawhlehni hmasa ber apiangin e-waste-te a hranga fûnin paih theih a ni dawn. Ṭawih thei leh
ṭawih thei lo erawh chu veng tinin an duh ní-ah an paih thei thung. In aṭangin bawlhhlawh (ṭawih thei leh thei lo, plastic, e-waste) thliar sa vek tur a ni.
AMC hotute sawi danin, SWMC chu bawlhhlawh thliar sate suma chang thei apiang hralh tura tih a ni a; leilung leh hriselna tichhetute hman
ṭangkai leh tura sawngbawlna hmun tura duan a nih bakah, hman tlak tawh lohte chu uluk takin mihring, nungchate leh mipui tui tlan tana hlauhawm lo tura phûm ralna hmun ruahman a ni.
Bawlhhlawh paih dan tur
• Ṭawih thei leh ṭawih thei lo veng tinin an duh ní-ah an paih thei.
• Thawhlehni apiangin plastic lam chi a hranga fûnin paih tel theih a ni.
• Thla tin Thawhlehni hmasa berah electronic waste lam chi fûn hrangin a paih theih.
• Lehkha khawng leh lehkha lam chite chu ṭawih thei lo zingah dah tur.
• Kuhva khehna káwrte chu ṭawih thei zingah dah tur a ni.
• In aṭangin bawlhhlawh ṭawih thei leh thei lo, plastic, e-waste te thliarin a hranga fûn sa vek tur.