Telephone, tui, electric leh zin manah MLA-te tan Rs. 2,10,00,878 hman a ni
Mizoram Assembly term liam ta, 7th. Mizoram State Legislative Assembly, kum 2013-2018 chhung khan MLA 25-te tan hamṭhatna an dawn theih zinna, tui, electric leh telephone hman man (bill) atan Rs. 2,10,00,878 hman a ni. MLA zingah sorkar aṭanga hamṭhatna an dawn tur zinga ṭhenkhat la lo mi pasarih an awm a, mi pahnih chuan tui, telephone leh electric bill bikah sorkarah pawisa an bill ngai lo.
Vanglaini-in RTI Act hmanga MLA-te hamṭhatna hman dân a zawhna Assembly Secretariat SPIO-in a chhan dânin, MLA 25 zingah R Vanlalvena leh Dr BD Chakma ten tui, electric leh telephone bill sorkarah an bill ngai lo a; Nihar Kanti Chakma chuan tui leh electric hman man a bill ngai lo. Lalrinmawia Ralte leh H Zothangliana te chuan telephone hman man sorkarah a dil ngai lo a, Vanlalawmpuii Chawngthu chuan electric hman man sorkarah a dil ngai lo bawk.
Hetih lai hian, MLA zinga minister of state/parliamentary secretary ni tawhte record erawh Assembly Secretariat lam chan a nih loh avangin an telephone, tui, electric leh zin man sorkara an lak dan Assembly SPIO-in a hre thei lo thung.
MLA 25 zingah tui, electric leh telephone bill la vek zingah mi 11-in cheng nuai thum chuang an la a; tui, electric leh telephone hman man belhkhawma sorkara bill la tam ber chu Lalruatkima niin, Rs. 5,99,924 a la.
Bill pathum la zinga sorkara bill tlem ber (bill lo hrim hrim, MoS & parliamentary secretary ni hmante tel loin) chu Dr Ngurdingliana a ni a, Rs. 2,07,511 a la.
Hetih lai hian, tui, electric, telephone leh travelling facility zawng zawng belhkhawm hnuah, MLA 13-in kum nga chhungin cheng nuai 10 chuang ṭheuh an hmang a, a hmang tam ber chu Lalthanliana niin, Rs. 14,92,884 a hmang. Lalruatkima leh Chalrosanga Ralte ten cheng nuai 14 chuang an hmang tling ve bawk.
MLA 25 zinga parliamentary secretary lo ni tawh - TT Zothansanga, Lt.Col. ZS Zuala, Lalrinmawia Ralte, K Lalrinthanga, Joseph Lalhimpuia, H Zothangliana leh Hmingdailova Khiangte te chu kum 2017-18 aṭangin MLA pangngaiah dah an ni. Chuti chung chuan parliamentary secretary ṭhin mi pasarih zingah Hmingdailova Khiangte chuan kum khat chhungin tui, electric leh telephone hman manah Rs. 2,19,521 a bill hman a; bill tlem ber Lalrinmawia Ralte chuan Rs. 51,351 chiah a bill thung.
Minister of state ni ṭhin Dr BD Chakma chuan minister aṭangin bânna a thehluh avangin kum 2016-2018 chhung MLA fáng a ni a, Vanlalawmpuii Chawngthu chu kum 2016 thleng MLA fáng niin, a hnuah MoS-ah dah a ni. MoS an nih lai leh an nih hnua an bill erawh SAD lam khawih a nih avangin RTI-ah hian Assembly Secretariat chuan an tilang thei lo a ni.