Kângmei ṭhelh nghal zel turin CM-in chah

State Level Fire Prevention Committee chairman Zoramthanga, chief minister chuan nimin aṭanga hman ṭan tâk Fire Prevention Week 2019 pualin thuchah a tichhuak a; kângmei a chhuah palh pawhin, neitu thinlung púa ṭhelh mit nghal zel tura ṭan lakpuiah mipui a sáwm.

Chief Minister chuan, Mizoramah kângmeiin ramngaw leh nungchate a tichereu nasa ṭhin tih sawiin, "Hei hi sor­karin ṭha lo a tih avangin kâng­mei vên kawnga sorkar, pawl leh mipui thawhhona atan 'Kângmei ven hapta' (Fire Prevention Week) chu kum 2000 aṭangin hman ṭan a ni a, kumin hi vawi 18 kan hmanna a ni," a ti a; kuminah Week thupui chu 'Ram tikâng lo turin mi tin i fimkhur ang u' tih a nih thu a sawi.

State level leh district level Fire Prevention Committee te, khawtlang hruaitute'n hmalaknate leh 'Kangmei ven hapta’ hmang ṭhin avangin mipuite chu ram tikâng lo turin an fimkhur phah hle tawh tih sawiin CM Zorama chuan, "Tlang ram lo neih hi ram kâng tichhuak tamtu a ni ve thei a, mahse, lo vah leh hâl chungchanga sorkar thupekte kan zawm chuan nasa takin ram kâng a tlem phah thei a ni," a ti.

CM Zoramthanga chuan, sorkarin dan zawm loh vanga kângmei tichhuakte hremna a nei nual tih sawiin, "Heng The Mizoram (Forest) Act, 1955 te, The Mizoram (Prevention & Control of Fire in the Village Ram) Rules, 2001 te, The Lushai Hills District (Jhumming) Regulation, 1954 leh a dangte pawh kan nei," a ti a; hrem ngai an awm loh nan sorkar thuchhuak zâwm ṭheuh turin sorkarin mipui a beisei tih a sawi.

Chief Minister chuan, Mizoram duat taka enkawl chu khua leh tui ṭha leh ringtu nihna aṭang pawhin Mizo mipuite tih tur a ni tih sawiin, "Kan ramngaw leh nungchate hi kan thil neih hlu leh kan rama khualzin hîptu ber an ni a, duat takin i enkawl ang u. Kum 2019 Fire Prevention Week kan thlen hian Zoram mipui zawng zawngte ram kâng laka kan ram ro hlute venghim turin a tharin ka sawm che u a, kângmei a chhuah palh pawhin neitu thinlung púa ṭhelh mit nghal zel turin ṭan i la ang u," a ti.