Vawiinah CAB Protest Day hmang dawn Dar 1:00-a Vanapa Hall kawta kal khawm turin NGO-ten mipui sawm

NGO Coordination Committee chu nimin khan Central YMA pisaah an ṭhukhawm a, Citizenship (Amendment) Bill, 2016 (CAB) dodal nan vawiin hian Aizawl leh khawpui hrang hrangah Protest Day hman a ni dawn tih an puang. 

Joint NGO chuan, Lok Sabha-in a pass tawh chu Rajya Sabha-ah pawh pass a nih theih nan sorkar laipuiin chhawpchhuah tuma hma a lak mek avangin vawiinah Protest Day hman an rel tih an tarlang. Protest Day hi Aizawlah chuan chhun dar 1-ah Vanapa Hall kawtah neih a ni ang a; district khawpui dang zawngah pawh hman tum a ni. 

Citizenship (Amend­ment) Bill, 2016 Protest Day a hlawhtlin theih nan Joint NGO chuan Mizoram mipui zawng zawngte ṭhahnemngai taka tel turin an sawm a, "Mizo mipui a tam thei ang ber flag dum kenga kalkhawm turin kan insawm tak meuh a ni," an ti.