Hnam tenau dangte Mizo society-a Pawh luh thiam a ṭha - Lalruatkima

Minister Lalruatkima chuan, Mizorama Zo hnahthlak ni lo, hnam tenau dang awmte chu Mizo society-a rîn luh leh telh thiam ṭha a tih thu sawiin, hnam dangte seng luh kawngah Naga hnam tih dan aṭangin Mizote'n zir tur an neia a hriat thu a sawi.

Mizoram sorkara IPR depart­ment-in MJA member-te tana tun hnaia press tour thawh li a buatsaiha kalte report pekna inkhawm nimin khan Aizawl Press Club-ah neih a ni a, MJA president Zonunsanga Khiangte-in kaihruaiin, IPR minis­ter Lalruatkima chu khuallian a ni.

IPR Minister chuan, Naga-te chu hnam péng hrang hrang leh ṭawng pawh chi hrang hrang nei ni mah se, hnam thilah chuan an ṭangrual vek zel tih sawiin, Zo hnahthlak Kom leh hnam dangte pawh Naga-ah an pawm vek a, Kom-te pawhin Naga-ah an inpawm tih a sawi a, "Hnam dang pawm chungchangah hian Naga ho lak aṭang hian Mizote'n zir tur kan nei niin a lang," a ti.

Lalruatkima chuan, "Keini Mizote hian kan chhehvela hnam tênau zawkte kan en danah hian, kan hnamah hian rawn tel ve lo se, Mizo ṭawng hi thiam miah lo se pawi kan ti lo zawk emaw ni tih tur a ni," a ti a; chu ai chuan, Mizo hnamah rîn luh dan ngaihtuah zawk ni se a ṭhat a rin thu a sawi.

Mizorama Zo hnahthlak ni lo hnam dangte chu Mizo society-a pawh luh telh telh ṭha a tih thu sawiin Lalruatkima chuan, "Mizo society-a kan pawh luh telh telh loh chuan kan inkar a zau tial tial ang a, saw laia an chenna ram saw Mizote'n kan chhuahsan tial tial ang a, an ramah kan neihtir ringawt mai ang tih a hlauhawm," a ti.

MNF-in Chawngte-a Hnam Rûn an sak chu sawisel an awm ṭhin tih sawiin, "Chawngte-ah Hnam Run kan sak ngam loh chuan a fuh lo ang. MNF flag an vai duh loh hun thleng ta se, a la pawi viau zawk thei a ni," a ti.

North Eastern Indira Gandhi Regional Institute of Health and Medical Sciences (NEIGRIHMS), Shillong bula Mizo damlote leh anmahni hruaitute thlenna tur khualbuk sakna tura Mizoram sorkarin kum 2014-a ram zau tak a lei, tun thlenga kut la thlak loh a nih thu press mite'n an sawi chu IPR Minister chuan, sorkara hotute hnenah a lo thlen tur thu a sawi.

Lalruatkima chuan, Mizo mipuite chu khualzinte thleng tura an inbuatsaih a hun tawh hlea a hriat thu a sawi a; state dang hmasawnnate zira kal MJA member-te'n hlâwk tak hun an hmang chu lawmawm a tih thu sawiin, "Chanchinbumite hamṭhatna hrang hrang ngaihtuahin sorkarin ngaihtuahna a seng mek a, press tour pawh neih zel tum a ni a, press workshop pawh district dangahte nen buatsaih tum a ni," a ti.

Mizoram sorkar chuan January 29 aṭanga February 9 thleng khan Aizawl leh district hrang hranga press mite tan press tour thawh li a buatsaih a, Nagaland, Kolkata, Sikkim leh Meghalaya-te an tlawh a ni. Tour report inkhawmah hian IPR joint director Lallianpuii pawhin thu a sawi.