Fire Prevention Week hawn a ni

Nimin khan Mizoram hmun hrang hrangah kângmei ven haptá, 'Fire Prevention Week' hawn a ni a, Aizawlah chuan Synod Conference Centre-ah mi­nister Dr R Lalthangliana'n a hawng. Week thupui chu 'Ram tikâng lo turin mi tin i fimkhur ang u' tih a ni.

Dr R Lalthangliana chuan, hriselna leh environ­ment humhalhna atan kawng pawimawh pathum inang awma a hriat thu sawiin, "Invênna, tihdam leh tih­changtlun a ni a, a pawi­mawh ber chu inven lâwkna a ni. Mizoram hi Mizote tana Pathianin ruat a ni a, hei loh hi ram dang a pe lo. Chuvangin, neitu rilru nena mawhphurhna lak ngamna ‘economic nationalism’ hi Mizo rilruah tuh a pawimawh a, hei hian sorkar pawh a khalh ngil dawn a ni," a ti.

Forest Suvey of India Report (2017) chuan Mizo­rama forest area sq.km. 531 hloh belh a nih thu tarlan a ni chu vanduaithlak a tih thu sawiin Dr R Lalthangliana chuan, "Ram chhung hmun dangte ngaihtuah chuan Mizoram hian ramngaw a ngah a, tui leh boruak pawh la thianghlim a, amah­erawhchu, fimkhur taka ven ṭhat a nih loh chuan hloh vek theih a ni," a ti a; hmànlai pipute tih ṭhin dan tam tak, tunlai khawvela hman tlak tawh lohte chu kalsan ngam a ṭul thu a sawi.

Environment, Forest & Climate Change minister TJ Lalnuntluanga pawhin thu sawiin, ram kâng tur venna atana sorkar hmalaknate zawm a pawimawh thu a sawi a, "The Mizoram (Prevention & Control of Fire in the Village Ram) Rules, 2001-ah pawh village council-ten ram a kan loh nana hma an lak an tur leh hremna an lekkawh theih dan tur tarlan a ni. Ram kang tur vên leh kângmei ṭhelh hi mi zawng zawng tih tur a ni," a ti.

Principal chief conser­vator of forest Dr Ch. M Rao chuan, ram kâng laka invenna atana EFCC depart­ment hmalakna hrang hrang a tarlang a; additional PCCF Lalthangliana Murray kaihruaiin mipuite'n thing, mau leh nungchate duat taka enkawl a, humhalh turin an intiam a ni.