Mizoram pumah Fire Prevention Week ṭan

Nimin khan Mizoram hmun hrang hrangah Fire Prevention Week hawn a ni a, district ṭhenkhatah chuan inelna turte buatsaih a ni.

Lungleiah chuan Convention Centre-ah Agriculture minister C Lalrinsanga'n a hawng a, Minister chuan, kângmei laka invennain economic development a keng tel tih sawiin, "Ram a kan chuan ramhmul damdawi eng emaw zat leh thing leh mau bakah, nungcha kâng ralte chu a man anga chhût pawhin ramin a hloh nasa tak zet a ni," a ti.

District forest officer Dr Vidhyasagar tarlan danin, Mizoramah kum 2018 khan hmun 1,860-ah ram kâng a awm a, chu'ng zinga hmun 534 chu Lunglei district-a thleng a ni.

Serchhipah chuan Serchhip College-ah Fire Prevention Week hi hawn a ni a; Week hawngtu district bawrhsap Sangchhin Chinzah chuan, Mizoram chu India rama ram tikâng nasa berte zinga mi a nih thu a sawi.

Serchhip DC chuan, kum 2004-2007 inkar leh 2009-2010 chhung khan Mizoram chu satelite hmanga endiknaah ram tikâng nasa ber niin a sawi a, "Kum 2007-08 leh 2010-11 ah pahnihna kan ni. Ram kâng tihlana map-ah chuan kan ram pum hi kan tikang ta emaw tih mai turin a awm. Mipuite'n kan ram hi kângmei laka kan chhan loh chuan a chhunga chengte hi kan him bik dawn lo," a ti.

Inkhawmah hian Thenzawl DFO Lalduhthlana'n ram tihkan chungchangah an district dinhmun a tarlang a, Serchhip MJA president Ramengmawia kaihhruaina hnuaiah mipuite'n Week thutiam an sawi rual.

Fire Prevention Week hi Lawngtlaiah chuan DC conferencee hall-ah bawrhsap N Chakhai-a'n a hawng. N Chakhai chuan, pi leh pute'n ram tihkan an hlau a, lo hâl dawnah uluk takin meikawng an sial ṭhin tih sawiin, "Anni aia nunphunga changkang zawk ṭhangtharte kan inthlahdah a, kângmei chhuah kan pawisa ta lo lutuk hi a pawi hle a, kan ṭhanharh a ngai tak zet a ni," a ti.

Week hawn inkhawm hi DCZF (Wildlife) PC Lalchhandama'n kaihruaiin, Lawngtlai SP Amit Goel pawhin thu a sawi a, mipuite chu ram tikâng lo tura fimkhur turin a chah.

Mamitah chuan Mamit Divisional Forest Complex-ah Fire Prevention Week hawn a ni a; Week hawngtu bawrhsap Vanlalngaihsaka chuan, ram kâng ven kawnga hmalakna chu EFCC department chauh tih tur ni loin, mi zawng zawng mawh a nih thu sawiin, "Kan ram thing leh mau kan humhalh ṭhat loha kan tihchereu avangin kan ram tuihnate a hma angin a tam tawh lo a, sava leh ramsate pawh an rêm zel a ni," a ti.

Week hawn inkhawm hi YMA sub-headquarters Mamit president K Eley Rosanga'n a kaihruai a, Mamit district MJA president C Lalramdinzela kaihhruaiin mipuite'n kângmei veng turin thu an tiam a ni.