CAB pass hmain Chakma foreigner-te Hnawhchhuah rûnpui neih a ngai - ZPM GS

Zoram People’s Movement (ZPM) chuan nimin khan an pisaah inkhawm an buatsaih a, thu sawitu ZPM general secretary Lalmuanpuia Punte chuan, "Citizenship (Amendment) Bill, 2016 (CAB) pass tluantlin a nih hma ngeia Chakma foreigner-te hnawhchhuah rûnpui kan beih a ngai," a ti.

Lalmuanpuia Punte chuan, "Central-a BJP sorkarin CAB tihhlawhtlin ngei tuma a inhmakhua mek lai hian, Mizorama lo lut ru Chakma foreigner buaipui tham khawpa awmte a rang thei ang bera hnawhchhuah hi MNF sorkar hian hna hmasa berah a nei ngei tur a ni," a ti a; zirlai pawlte leh NGO dangte'n theihtawp chhuaha CAB an dodal laia chief minister Zoramthanga’n CAB dodalna tak tak a la nei lo chu ram leh hnam hmakhua aia lalna leh thuneihna a engto zawkzia lantirtu a nih thu a sawi.

Mizo hnam leh sakhua tihboral duhtu BJP-te MNF sorkarin tun thlenga a la inthlun zawmpui reng chu Zoram mipui zahlohna leh palzûtnaa an ngaih thu sawiin Lalmuanpuia chuan, "MNF sorkar hian Mizo hnam hi min hmangaih tak zet a nih chuan BJP nena an inzawmna, NEDA aṭang hian a rang thei ang bera inhnûkdawk turin kan chah nawn leh a ni," a ti.

MNF chu CAB tihpuitlin tumtu BJP thawhpui an nih avangin Lok Sabha inthlanpui awm turah pawh Mizo mipuiin BJP leh a sangawi zawnpui MNF-te chu an hnâwl a ṭul thu a sawi a; ZPM-te chu Mizo ram leh hnam himna tura hma latu nia sawiin, ṭhahnemngai taka ṭawiawm turin mipui a ngen a ni.