Ka thusawi an kailek a ni - School Education minister

School Education minister Lalchhandama Ralte chuan, eptu party ṭhenkhatin a thusawi kailekin, Mizoram Public Service Commission (MPSC) thuneihna laksak tumah an puh niin a sawi.

Lalchhandama hian nimin khan Mizo Hnam Rûna inkhawmah thu sawiin, MPSC thuneihna laksak an tum lo niin a sawi a, "Sorkar hmasate'n an lo ngaihsak tâwk lo nge, zirtirtu hnaruak hnawhkhah loh 2,300 chuang a awm. Zirtirtu pakhat chauh awmna leh pahnih chauh awmna sikul tam tak a awm a, indaih lohna zualpui hnawhkhat tur hian MR/contact teacher sorkarin eng emaw zat lak a tum mai a ni. MPSC hian hna nghet an la ṭhin a, tuna kan lak tur hi chu MR /contact teacher an ni," a ti.

MPSC-in primary school teacher 100 leh middle school teacher 60 lak hna a kalpui mek tih sawiin Minister chuan, "MPSC zirtirtu lak turah pawh hian kan inah leh pisaah min pantu an awm nual. MPSC hna lak turah hian a thiam thiam, a tling tling an lak ka duh. Pakhatmah ziakin emaw, phone-in sawipui ka nei lo," a ti a; ṭhalai lehkhathiamte beidawnga siam a duh loh thu a sawi.

Lalchhandama Ralte chuan, MR/contract teacher lak turah sikul dinna khuaa mi ngei zirtirtu la turin sorkar a inruahman tih sawiin, "Tunah hian kan ram education hi a damlo nasa a, zirtirtu indaih lohna a nasa tak zet. Hmun tam takah ni 100 inhlawhna aṭanga khawtlangin zirtirtu an rawih te, zirtirtu vêkin an ṭhahnemngaihnaa an hlawh aṭanga zirtirtu dang an lak belhte an awm nual. Hei avang hian 'Sorkar kan awm ve alawm le' tiin kan mipui harsatna sutkian kan tum a ni," a ti.

School Education Minister chuan, SSA leh RMSA hnuaia zirtirtute kal dan tur sorkar hmasain ruahmanna a siam chu pawi a tih thu sawiin, "An dinhmun a ṭhat zawk theih nan a tahtawlin an kalkawng tur kan duang mek," a ti a; SSA leh RMSA hnuaia zirtirtute'n security an neih theihna tur ruahmanna an siam mek niin a sawi.