SAI Complex puitling din dan tur sawipui

Sports & Youth Services minister Robert Romawia Royte chuan, Union Sports Minister nena an inkawmna bawhzuiin nimin khan a pisaah Sports Authority of India (SAI) regional director Francis Paul, SAI Imphal leh a thawhpuite a kâwm a, SAI complex puitling Mizorama din dan tur a sawipui.

Robert Romawia chuan, state sorkar aṭangin sport infrastructure leh sport zirna academy-te mamawh zat dinna tur sum a awm loh thu sawiin, "SAI kaltlanga Mizoram ṭhalai leh naupangte'n sport discipline hrang hrang an zirna tur SAI Sports Complex puitling din a ṭul. Complex dinna atan hian Mizoram sorkar chuan ram pawh a nei thei mai ang," a ti.

Francis Paul chuan, Mizoramah SAI Complex lian neih chu Mizoram sport discipline hrang hrang tihhmasawn nan a pawimawh thu sawiin, Sports & Youth Services department rawtna siam thuai tur leh chu rawtna chu theihtawpa a taka chantir a inhuam thu Minister a hrilh.

Sports Minister-in SAI nena thawkhoa Kolasib Saidan emaw, a remchang dangah emaw football academy SAI project aṭanga din tur leh naupang football zirlaite châwmna stipend leh football zirna field-a phûl lem phahsak turin a ngenna chu SAI hotute chuan a thuphungin an pawm a ni.