Mamit dist. kawng siam mek enfiah

Mamit District Ṭhalai Pawl (MDṬP) hruaitute chuan nimin khan Mamit district panna kawngpuia kawngpui chhak khâma lung a tlak ṭhin vanga harsatna thleng ṭhin pumpelhna tura Lengte lama kawng thar siam chu a hmunah an enfiah a; kawng siamtute chu a hun taka zo hman turin an hrilh.

Rawpuichhip chhak NH-44A Rockfall By-pass CC Road an tih hi Lengte khaw lamah kaltirin Rawpuichhip thlen hmaah NH-44A kawngpui a pawh leh a; cement concrete road (CCR) hi Mizoramah a pakhatna tur a nih avangin hna thawh dan tur dik taka thawk tur leh tun February thla chhung ngeia zo hman turin MDṬP hruaitute chuan kawng siamtu Ratna Infrastructure Pvt. Ltd. project manager Shankar leh engineer Srinivash-te an chah a ni.

Kawng chu cement concrete-a siam a nih avangin, Mamit district mipuiin kawngpui ṭha leh tlo zawk an neih theih nan, kawng siam hna zawh a nih hma chu zawh rih lo turin Mamit district mipui leh khualzinte an ngen a ni.