KHAWTHLIR

Falkawn Branch YMA chuan nimin khan State Referral Hospital blood bank-ah blood donation camp an huaihawt a, mipa 38 leh hmeichhia 11-te'n thisen unit 49 an pe.

Mizoram State Legal Services Authority huaihawtin February 9, Inrinni khan hmun hrang hrangah Lok Adalat an ṭhu a; thubuai 58 an ngaihtuah zinga 17 chu an chingfel/sawirem a, thubuai dang pasarih chu chingfel loin an titawp. An thubuai chinfel zawng zawng sum leh paia hlut zawng chu Rs. 51,44,700 a ni. 

Nimin khan Kolasib additional DC Lalṭanpuia Hnamte hoin DC conference hall-ah Chapchar Kût hman dan tur sawiho a ni. Kût Pa atan bialtu MLA K Lalrinliana, minister sàwm an rél a, Kût lawmna tura a taka hna thawk tur Chapchar Kut Working Committee an din nghal.

Governor Kummanam Rajasekharan chuan nimin khan Orthodox Theological Seminary, Kerala-a Mizo zirlai Rev. Zohmangaiha, Rev. Lalbiakhlira Rev. Vanlalliana leh Rev. Vanlalmuanawma te a kâwm. Zirlaite hian Kolkata, Guwahati leh Aizawl inkara thlawhtheihna chuan man sang leh harsatna an neihte an thlen a; Governor chuan, harsatna sukiang turin theihtawp a chhuah tur thu a sawi. 

Traffic SP chuan thupek chhuahin, nizan aṭang khan Bazar Bungkawn leh Sikulpuikawn inkar kawngpui (main road) siamṭhat hna zan dar 9 aṭanga zing dar 4:30 inkarah an thawh a nih thu a tarlang a; hei vang hian kawngpui chanveah chauh lirthei tlan theih a ni tih tarlang, lirthei khalhtute chu fimkhur taka lirthei khalh turin a chah a ni.

February 7 aṭanga a awmna chin hriat loh Vanlalnghaki (73), Chaltlang Lily Veng chu nimin chawhma dar 10:30 vel khan Chaltlang Lily Veng huam chhung Sairang road kawngthlangah thia hmuh a ni. Chaltlang Lily Veng YMA hruaitute hnen aṭanga thudawn danin, Vanlalnghaki ruang hi a chhungten postmortem ngai an tih loh avangin postmortem a ni lo.