CAA & UCC duh loh nachang hre turin Central KṬP Leader-in ṭhalaite a chah

Central KTP leader Rev. Dr K Lallawmzuala chuan, Isua leh a Chanchin Ṭha ralna tur kawngah Mizoram leh Mizote hruai lo turin ram hruaitute a chah a; Mizo mipuiin Citizenship Amendment Act (CAA), 2019 leh Uniform Civil Code (UCC)-te an duh loh thu a sawi.

Rev. Dr K Lallawmzuala hian March 1, Pathianni zan khan KTP Generel Conference inkhawm hnuhnung berah thu a sawi a; "Kan ram politician-te ka cho duhna chu, lalna leh thuneihna in duh a nih pawhin Lal Isua leh a Chanchin Ṭha ral vekna kawngah hi chuan min hruai suh u; kan duh lo," a ti.

CKṬP Leader chuan, "CAA kan vote dawn a nih pawhin, he thil hian khawi lam kawngah nge min hruai dawn tih i ngaihtuah teh ang u," a ti a; tunah UCC buaipui mek a ni tih sawiin, "India ram sûkthlêk hi rûi lo hai lo tan chuan kan hre vek. Hemi kawngah hi chuan min hruai lui suh u. He ram lungphûm, Lal Isua chanchin ṭha leh a lal ram tan hian a pawi thei a ni," tiin, KṬP member-te chu CAA leh UCC duh loh nachang hre turin a chah.

Ram hruaitute chu kawng dik leh ṭhaah an kal a nih phawt chuan ṭawngṭaina nen theihpatawpa an puih tur thu a sawi rualin Rev. Dr K Lallawmzuala chuan, "Kohhran leh Chanchin Ṭha ral vekna tur kawnga min hruai a nih erawh chuan, kohhrante hi a tuar na ber tur kan ni a, eng vangin nge kan au chhuah loh ang le? Pathian thu aṭanga dik lo leh ṭha lo hi chu a khawi laiah pawh kan do ngam tur a ni," a ti.

CKṬP Leader chuan Mizo ṭhalaite chu ram dinhmun ngaihtuah chiang tur leh huho chakna hmang thiam tura chahin, "A huhoa kan ṭan thiam hian felna hriamhrei tak tak kan ni thei," a ti a; huho chakna hmang turin pawl rilru dah bo a, kohhran páwl hrang hrangte an ṭan rual a ṭul thu a sawi.

Rev. Dr K Lallawmzuala chuan, democracy-ah mipuiin an tha chakna an hman thiam poh leh ram a kal dik a, ram a ding chhuak ṭhin tih a sawi a; 'Kan party tih a nih chuan kan ṭan tur a ni a, kan party tih a nih loh chuan ka sawichhe tur a ni' tih rilru paih a ṭul thu a sawi bawk.