Citizenship (Amendment) Bill dodalin Aizawlah Protest Day hman a ni

Protest Day hi Central YMA vice president R Lalngheta'n a kaihruai a; Joint NGO chairman Vanlalruata chuan thu sawiin, Mizo mipuite teirei peih an awm ta lo em ni tih theih tura lungrualna tlahniam anga awm ṭhin chu pawi a tih thu a sawi rualin, social media lama inchirhthehna lang leh ṭhin pawh ná a tih thu a sawi a, Mizo ram leh hnam tana hmalaknaah cháng dang lo kân nia ngaih theih ang chi thil awm lo se a duh thu a sawi.

CAB pass a niha hmang ṭangkai thei tur Mizo ni lo, Mizo let tam tak an awm tih sawiin Vanlalruata chuan, "Ramri vengtu awm lo ang maiin Mizoram leh ṭhenawm ram nena inrìna lai a áwng huau a, Mizote tan a him lo hle dawn a ni," a ti. CAB chu Hindu lalram din tumna a nih thu te, a tirah Hindu chauh huamtir a nih thu leh hlauhthawnna a awm avangin a hnuah sakhaw dangte pawh huamtir leh a nih thute a sawi bawk.

Joint NGO Chairman chuan, CAB pass a nih lohna tura theihtawp an chhuah chunga sorkar laipuiin pass tuma hma a la zui zel chu hriatthiam har an tih thu sawiin, buaina duh loh mah se, a ṭul chuan an hmachhawn ngam thu a sawi a; hnam dangte hriat theih turin Sap ṭawnga thu sawiin, "India tana zalenna sual a nih lai kha ngaihtuah let u la, inrahbehna leh inhnehchhiahna in duh lo a, zalenna hmuh a nih thlengin in sual a, keini pawhin in tih ang chu kan ti ve dawn. Kan thisen hi Mizo thisen a ni a, India mi kan nih na erawh chu dan hnuaiah a ni," a ti.

MZP president L Ramdinliana Renthlei chuan, Mizote'n hnam an vei dan chin a inang ta lo hlea a hriat thu sawiin, mahni peih chinah chauh an vei ta em ni tih ngaihtuah theih a nih avangin inenfiah a ṭul thu a sawi a; CAB chu duan a nih tirh aṭangin NESO angin dodalna lantir nghal a nih thu a sawi.

Ramdinliana Renthlei chuan, CAB pass a nih lohna turin NGO hmalaknain thheihtawpa hmalak a nih laia sorkar laipuiin pass tuma hma a la chu Mizote an ngaih pawimawh lohzia tichiangtu a nih thu a sawi a, "CAB dodala hmarchhak state hrang hrangte'n lungrual taka hma an lak theih laia Mizorama pawl, party leh mimalte kan lungrual ve thei lo hi inenfiah a ngai hle. Joint NGO anga hmalakna political party ṭhenkhatin sawiselin, hamṭhat lak tuma hma la an awm a, hei hi hnam tan a pawi thei a ni. Lungrual taka ke pên chu ram leh hnam tan thil ṭha ber a ni," a ti.

Protest Day-ah hian MHIP, MUP leh MSU aiawhte pawhin thu an sawi a; CAB pass a nih lohna atan Pathian auin ṭawngtai rual a ni bawk.

Protest Day-ah hian minister Lalruatkima leh TJ Lalnuntluanga, Congress partgy president Lal Thanhawla te nupa, ZPM leader K Sapdanga, PRISM president Vanlalruata leh political party hruaitu dangte pawh an tel a ni.