Sum sem leh a thlawna dawn ringawt hi Ei leh bara Pathian ram thlen dan tur a ni lo - Prof. H Lalramnghinglova

ZPM Research & Evaluation Wing chairman Prof. H Lalram­nghinglova chuan sum sem leh a thlawna dawn ringawt chu ei leh bara Pathian ram thlen dan tur a ni lo.

Prof. H Lalram­nghinglova hian nimin khan an party pisa-ah thu sawiin, Pathian rinchhan ramte chu ei leh barah an intodelh ṭhin thu a sawi a, "An taima a, an thawkrim a, an intodelh ṭhin. Pathian­in thawk theia min siam hnuah, mihringte mawhphurhna chu tai­mak a, thawhrim a ni. Kan mawhphurhna kan hlen chuan ei leh barah Pathian ram a lo thleng ang. Sum sem leh a thlawna dawn ngawt hi ei leh bara Pathian ram thlen dan tur a ni lo," a ti.

Kan ramin kawlphetha a mamawhzat chu Mw. 100 vel a nih thu sawiin Prof. H Lalramnghinglova chuan, "Tunah Mw. 20 vel kan siam. Power siam chhuah theihna tura khuah awlsam tak lui ṭhahnem tak Pathianin min pe. Chu chu politician-te hian kum 40 kalta aṭang khan an sawi an sawi a, inthlan dawn apiangin an sawi uar ringawt ṭhin. Uar taka sawitute ngei chu an han sorkar a, an sorkar chhung pawh chuan an sawi an sawi a, sawi ringawtin an term an hmang zo zel," a ti a, kawlphetha siam chhuah tak tak aiin a contract hna an tuipui zawk zel thu a sawi.

Prof. H Lalram­nghinglova chuan India ram state zingah mai ni lo, khawvelah pakhatna kan nihnate chu HIV vei tam lamah leh cancer vei tam lamah a nih thu sawiin, "Hei hi a chhan chu corruption vang a ni. Hriselna hna thawhnaatana sum ruahman kan eiruk vang leh khawtlang nun ven himna atana sumte kan eiruk vangte a ni awm e.  Hindu pa Kejriwal te, sakhaw mi tehchiam loa ngaih Donald Trump-ten khawvel hriatah Isua an hmatheh a, an chawimawi. Kristian zaa za inchhalna ramah hian, Lal Isua hmatheha hmang duh hmel hmuh a nghahhlelhawm hle," a ti.