Cong-in CAB chungchanga Mizo thlavâng hauh ngam lo-ah MNF puh

Congress party ṭhalai, Mizoram Pradesh Youth Congress Committee (MPYCC) chuan thuchhuah siamin, Citizenship (Amendment) Bill, 2016 (CAB) chungchangah MNF kaihhruai sorkar chu Mizote thlavâng hauh ngam lo-ah an puh.

MPYCC chuan, CAB duh lohna India ram hmun hrang hrangah lantir a, hmarchhak state dangte'n na taka an duh lohna kawng hrang hranga an lantir lai leh NDA sorkar na taka an kar laiin, Mizoram sorkarin dodalna tura hmalakna awmze nei a la nei lo chu mak an ti a, an dem thu an sawi a, "Sorkar laipuia tlâktlum loh hlauh vangin kan ram leh hnam chhan nan ke an pên chhuak ngam hlawl lo em ni?" an ti.

Chutih laiin, Lal Thanhawla chief minister a nih lai, Congress sorkar laiin June 28-29, 2018-ah Assembly session-ah CAB duh lohna resolution pass a lo ni tawh tih sawiin MPYCC chuan, "Na taka do zel hi Congress tum a ni," an ti a; Lok Sabha MP CL Ruala leh Rajya Sabha MP Ronald Sapa Tlau ten theihtawp chhuahin duh lohna an lantir bawk tih an sawi.

Congress ṭhalaite chuan, NDA sorkarin CAB kaltlangpui tuma chet a la zel chu an duh lo tak zet tih sawiin, Indian Youth Congress (IYC) huaihawta CAB duh lohna Rajnath Singh, Union Home minister in kawta neihah pawh MPYCC president Dr Lalmalsawma Nghaka a tel ve tih an sawi a; NGO Coordination Committee-in nimina Protest Day an huaihawt chu Congress party-in an thlawp a, Congress party president Lal Thanhawla te nupa leh an party hotu ṭhahnem tak an tel thu an tarlang bawk.