Sikul ṭan hun - zing dar 9

Council of Minis­ters chu nimin khan chief minister Zoram­thanga kaihhruaiin Chief Secretary Conference Hall-ah an ṭhu­khawm a; Mizorama minimum wage rate siamṭhata tihpun rawtna an pawm a, sikul ṭan hun atan zing dar 9 ni se, an ti.

Sorkar thuchhuah tarlan danin, Cabinet mee­ting chuan Mizorama sikul ṭan hun atan zing dar 9 ni se an tih rualin, private school ṭhenkhatah chhan hrang hrang vanga dar 9-a ṭan thei lo an awm chuan School Education Director hriattir ni se, tiin an dah.

Mizorama minimum wage rate hman mek chu tihpun an rel a; rate thar an pawm ang chuan, muster roll (MR)-a thawkte hlawh chu ni khatah unskilled tan Rs. 380, semi skilled tan Rs. 420, skilled-II tan Rs. 520 leh skilled-I tan Rs. 640 a ni ang. 

Cabinet meeting chuan, Social Welfare depart­ment hnuaia PISGAH Reformatory Centre, Thingsulthliah tih­changtlunna leh rilru buai, enkawlna an ma­mawh ang dawng tawh, chênna tur nei lote tana rehabilitation home siam rawtna an pawm. 

Nimina Cabinet mee­ting-a agenda ngaihtuah zingah Mizoram Police Service (Amendment) Rules, 2018, Draft Mizo­ram Animal Husbandry & Vete­rinary Services (Amen­dment) Rules, 2018, Mizo­ram Essential Services (Amendment) Bill, 2019 leh, Mizoram Commission for Women (Amendment) Rules, 2019, Mizoram Lotteries (Regulation) Rules, 2019-te pawh a tel a ni.