Sa talhna hmun rukah siam

MNF member H Lal­zirliana zawhna chhangin AH & Vety minister Dr K Beichhua chuan AH & Veterinary department chuan sa talhna hmun 6-ah an siam tawh thu a tarlang. Sa talhna hmun ṭhenkhat hman ṭangkai a nih loh thu sawi chhuah a nih chungchangah Dr K Beichhua chuan sa talhna hmun chu a hlat deuh avang leh vei vahna atana senso a tam deuh avangin sa talh turten an hman ṭhat duh loh thu sawiin, "Department chuan hman turin a ti lui ngawt thei lo," a ti. AH & Vety dept.-in sa talhna hmun a siam­na hmunte chu Bung Bangla; Mualpui, Aizawl; Bawngkawn, Champhai (Khankawn bul), Lunglei Electric Veng leh Ser­chhip Mualvawmahte a ni.

ZPM Legislature Party leader Lalduhoma zawhna ziaka chhangin Agriculture minister C Lalrin­sanga chuan Mizoramah kum 2015-16 aṭanga 2019-20 inkarah oil palm ching chhungkaw 7,109 an awm thu a tarlang.

Agriculture Minister tarlan danin, kum 2015-16 aṭanga 2019-20 chhung hian oil palm ṭiak 8,96,261 chin tura pek chhuah a ni a, oil palm ṭiak manah hian cheng vbc. 5.47 sen a ni. Tun laia oil palm rah leisakna chu kg. khat Rs. 5.50 a ni.