Save Tuitun March buatsaih a ni

Kawnpui, Mualvûm, Bualpui leh Thingdawl khaw mipuite an tui tlan ber Tuitun lui leh Chhimluang lui humhalh an duhzia tarlan nan nimin khan Save Tuitun March an buatsaih a, mipui ṭhahnem takin kawng an zawh.

Save Tuitun Committee buatsaih kawngzawhah hian Tuitun leh Chhim­luang lui luanna huam chin - New Khamrang leh Tuitun inkarah kawng zawh a ni a; Kawnpui, Bualpui leh Thingdawl aṭangin khawtlang mipui ṭha­hnem tak an tel.

Tuitun leh Chhimluang luite chu mipui tlan a nih avangin túr hmanga hrâi lo tur leh lui kam velah lirthei khalhtute'n bawlhhlawh paih lo se an duh thu an au chhuahpui a; PHE department, Environment Forest & Climate Change department leh YMA aiawhte'n thu an sawi.

Tuitun lui kama industry lian tak tur siam mek, Zoram Mega Food Park hotute chu lui tihbawlhhlawh an remtih dawn loh thu an hrilh a; mipui ei lai a nih avangin mipui thinurna a chhuah hmain an industry chhunga bawlhhlawh sâwngbawl dan fimkhur tur leh, her danglam ngai a awm chuan her danglam nghal turin an chah.

Aizawl aṭangin dawrkaite'n vai motor-ah bawlhhlawh paih tur an thawn thlak ṭhin bakah, lui pahnih chu kawngpui kam hnai taka awm a nih avangin túr hmanga hrai an awm ṭhin tih an tarlang a, "Hengte avang hian luite hi a thianghlim tâwk tawh lo nia hriain Save Tuitun Committee chuan kawngzawh a huaihawt ta a ni," an ti.

An tarlan danin, January 2019 aṭangin Kawnpui, Bualpui leh Thingdawl V/C leh YMA branch-te chuan lui pa­hnihte veng turin ni tin mi panga a in­chhawkin an duty tir ṭhin. Kawngpui sir lui kam tui awmnaah eirawngbawla chawlh an remti lo a, khaw dang aṭanga sangha man tuma kalte pawh an hawtir zel a ni.