Assembly Speaker-in Chalfilh bial a fang

Mizoram Legislative Assembly speaker Lalrinliana Sailo chuan tunlai hian a bial, Chalfilh constituency-a khaw hrang hrangte a fang mek a, MLA atan an thlan tlin avangin lawmthu a sawi.

Lalrinliana Sailo hian nimin khan Záwngin, Phullen leh Thanglailung khuate a tlawh a, Thawhṭanni khan Suangpuilawn, Làmherh, Vanbâwng leh North Khawlêk khuate a tlawh bawk a; khua a tlawh apiangah khaw­tlang hruaitute nen an inkawm bakah, vantlang inkhawmte neih a ni.

Khaw hrang hrang a fannaah Lalrinliana Sailo chuan, Chalfilh bial tan hmasawnna hna thawh nasat a tum sawiin, "H trio, hmar tlangdung hmasawnna leh hmangaihna kan tuh ang a, kan chíng ang a, kan ling ang. A lo par ang a, khawtlang tan, bial tan malsawmna a lo ni dawn a ni," a ti a; a bial chuan hmangaihna a mamawh zuala a hriat thu sawiin, tui, sikul leh kawng ṭhate an mamawh thu a sawi.

Assembly Speaker chuan, MNF ministry-ah chief minister Zoramthanga hoin zûk leh hmuama fihlim, ṭawngṭai ngaina mi, ruih theih thila inhnamhnawih lo an ni vek mai nia sawiin, chu chu sorkar kalphung thar pakhat niin a sawi a, "Congress-a kan awm lai khan central sorkar dawr theite chu Pu Hawla'n a rap hrual hrep zel. Tun­ah chuan kan CM Pu Zoramthanga'n, 'Zoram tan alawm, zu kal rawh u' a ti zawk a, kan MLA leh minister-te Delhi-ah an phu suau suau a, hmasawnna sum an rawn hawn pawp pawp mai. Kan ministry hian hmasawnna hmel thar a thlen ngei dawn a ni," a ti.

Lalrinliana Sailo chuan, "Kan bialah hian khi lama leng lo, Zo fate zingah lo lut an tam hle. Zo fate inpui chu Mizoram hi a ni a, Zo hnah­thlak tu pawh lo lut se, keini chuan rilru zau tak nen pa chan changin kan lo kuangkuah tur a ni," a ti a; Isua kraws, tihdamna leh malsawmna ni tur an mamawh avangin Chalfilh tlangah kraws lian din an tum thu a sawi a ni.