MSU-in an din champha an lâwm

Mizo Students' Union (MSU) general headquarters, Aizawl chuan nimin khan MSU din champha vawi 18-na, Holiday Palace, Sihhmuiah an lawm a, 'Ram leh hnam nghahfak zirlaite' tih thupui an zirho. MSU din champha lawm nan hian hnatlan a nih bakah, khaw ṭhenkhatah chuan thisente an pe a ni.

MSU din champha lawmna hi MSU vice president J Lalmuanzuala'n a kaihruai a, MSU hruaitu hlui te, college hrang hrang­a zirlai hruaitute leh zirlaite bakah, hnam pual zirlai pawl hrang hrang hruaitu mi 100 chuang an tel. 

MSU adviser Lalnunpuia Kawlni-in thupui a sawi bakah, president Vanlalliana Khiangte-in thu a sawi. 

MSU President chuan, MSU chu February 11, 1986-a din ni mah se, mei mit loa a kalna chu February 2001 aṭangin a nih thu a sawi a, "MSU-ah hian Mizo zirlai zawng zawng an leng vek a ni," a ti.

MSU din champha hi hmun hrang hrangah lawm a ni a; Kolasib-ah chuan TNT hnenah thilpek an hlan. Hnahthial­ah chuan thisen pek rûnpui huaihawt niin, zirlai leh mi ṭhahnemngai mipa 39 leh hmeichhia 21-te'n thisen unit 61 an pe. Khaw ṭhenkhatah chuan zirlai harsate ṭanpuina hun leh khawlai tihfai leh thing phun hnatlangte neih a ni.